Вай гьантрай МахIачкъалалив «Ватан» комплексрал брифинг-залдануву хьунни жулла республикалий цIусса турмаршрутирдащал кIул буллалисса, жучIанма букIлантIисса хъамал ва туристътал миккун тамашалий буцлантIисса турфирмардал пишакарталгу гьурттусса презентация.

БатIаврил сакиншинначи­шиву дурсса ДР-лул Мин­туризмалучIасса «Дагъусттан» цIанилусса Туризмалул информациялул центрданул пишакартурал бусаврийну, вай цIусса маршрутру туризмалул аралуву Дагъусттаннал бусрав-сий гьаз дуллансса, жучIанма бучIан гъира бусса туристътуран нахIу лачIунсса маршрутру хьунтIий дусса дур.
БатIаврий гьуртту хьунни , жулла республикалийсса турфирмардал вакилтал бакъасса, блогертал, журналистътал ва жяматийсса ишккаккултгу.
БатIаву тIитIлай, «Каспий» санаториялул вакил Руслан Гереевлул кIицI лавгунни, Да­гъусттаннай ялу-ялун туризмалул ара лядуккаврих хъунна­сса къулагъас дуллай бушиву ва цIусса маршрутру тIитIавугу жучIанма чIявусса хъамал бучIан бансса ца чаран бушиву.
«Дагъусттан» ТИЦ-рал каялувчи ХIажимурад МахIам­мадовлул кIицI лавгунни шиная шинайн жулла республикалий машгьур хъанай душиву этнотуризм, ва зунттал щархъаву ва аралуву зун ччисса, гъира бусса жагьилтал гьарза хъанай бушиву.
Махъру лавхъминнал мукунна чIурчIав дурунни, этно­туризмалуцIун, республикалий лябукку буну щурунтIишиву экотуризмгу.
Ахирданий «Дагъусттан» ТИЦ-рал цинявннайх дарчIунни полиграфиялул продукция – гидтурал ишла дан ва туристътурайх дачIин бучIисса картарду, буклетру, дакIний личIансса бахшишру ва цаймигу мюрш-кьюрш. Бувцунни сакиншинначитурал шиккун бувкIми «Ватан» комплексрачIасса дучрай сайр бай майданнивгу, щалва комплекс ккаккан буллалисса экскурсиялийгу.