Зунттал лишанну ва шагьрулул хъархъаллу

Шеърирдаву чIявуну кIицI лавгун бикIай хъуннасса ВатандалуцIун инава увсса чIиримур Ватангу дакIния ду­ккан ритан къабучIишиву. Инсаннан арулла шин хьуннин асар хъанай бивкIсса затру гания гихунмайсса оьрмулул кIулшиврул дачIину бикIайссар тIий бур аьлимтал-психологталгу.
Жунма цинявннан къакIулну бакъахьунссар гьарца кIанттал цила-цила сийгу, ххуйшивугу, караматшивугу душиву. Шагьрулий мукунсса кIантту инсантурал цалла карунних хIасул буллай бухьурча, зунттаву тIабиаьтрал хIасул бувну бур. Ялагу зунттаву ци караматшиву дикIай учирча, цимиллагу ккарксса затру, яруннин ххал къахъанай диркIсса кунна, ишарартту хIасул хъанан дикIай.


Уттигъанну на уссияв Ма­хIачкъалалив уссил душнил хъатIуй. ХъатIи буллалисса кIану бия, Буйнакскийл цIанийсса кIичIиравалугу кьабивтун, му­ххал ххуллул лултту чулийсса ца залдануву. Гиву махъ ла­хъан ттуйн оьвкуна тямаданал.

ЦачIана гъан шайхту, га хъинну мюршну уруглан ивкIуна ттул касттундалул мурцIнийн лачIун дурсса лишандалух. Га цурдагу дуссия хъинну яргну чIалачIисса Ккуллал райондалул лишан. «Му ци лишанни?» – тIий, цIухлахисса чIумал, нагу пахрулий бусара зунттал билаятрал лишан душиву ва, ваний­сса, барзу щябивкIсса зунттул хъазамравун бувтсса гьайчалттуйсса «мазругу» райондалул 12 кIанттул сакиншин душиву.

Мажлис къуртал хьуну мукьах на увкссияв хьхьирил зуманив. Ттун хъинну тIааьн дирзуна гикку дурсса ххуйшивуртту. Бивхьуну бия скамейкартту, ххютулу щябикIайсса дахаллу, бувну бия бетон бавкьусса ххуллурду. Ххуйри, ххаллилли.

Яла на, ттунма аьркинсса маршруткалийнгу лавхъун, авчуссияв вокзалданул чулухунай. Гьай-гьай, ттун дакIнийн дагьуна нава цалчин МахIачкъалалив увкIсса чIунгу. Гания махъ чIярусса дахханашивуртту хьунни шагьрулувугу, инсантурал багьу-бизулувугу. Мува мутталий итталу дарцIусса суратрал ттул дакI ццах учин дурсса кунна хьунни. Жагьил заманнай букинистикалул луттирдал ттучан бивкIсса къатри бия хъархъаллай бавцIуну. «Ттул лу­ттирдал ттучандалулгу» аьш-бакI дакъая.

Хъиривмур кьини Гъумуча Щардал шяравалличIан ивсса чIумал, баргъбуккавал чулий­сса зунттурдал щамарал ссимиялттайн ящайхту, кIай, щиллив ца хъуннасса ттарал дурккун, исвагьи бувсса кунма чIалан бивкIуна. КIайннул махъ зунттул ялув щябивкIсса барзуха лахьлахьисса Къимизу-Зунттул тажгу бия. Ттун кIа сурат, явара, цалчинъя ккаклакиссагу. БувчIуна хIазрансса бакъашивугу яру ккутIрур, дакIнил лакъаласурча, тIисса затгу.

Ванийну учин ччимургу укунссар: «Зунттал билаят – му гьарца лахIзалий цила караматшивуртту тIитIлатIисса кIану бур, – куну. Вай тIитIалартту зунна ххал хьуншиврул булухьхьияра зунттавун, яхъанахъияра зунттаву!».