Агьалинал цIуллу-сагъшиврул цIанийсса акция

Вай гьантрай ЦIуссалакрал райондалий хьунни агьали коронавирусрал инфекциялия буруччаву мурадрайсса акция.


Волонтертуращал архIал ЦIуссалакрал райондалул Культуралул, жагьилтурал политикалул, спортрал ва туризмалул управлениялул хъунаманал хъиривчу Заур МахIаммадов, методист ХIабибуллагь Ибрагьимов, машинарттал ххуллийн був­ккун, щупиртуращал коронавирусрал инфекциялия буруччинсса куц бусласисса ихтилатру бунни. Вайннащал акциялувух гьуртту хьунни Аьрасатнал ОМВД-лул ЦIуссалакрал райондалийсса полициялул зузалт ва Герзел пострайсса къуллугърал аьралитал. ХIакьинусса кьини ЦIуссалакрал райондалий пандемиялуцIун дархIусса тагьар ялу-ялун ягин хъанай най дур, чIяву хъанай бур инфекциялул къашавай хьусса инсантал.

Мунийн бувну, райондалул агьали эпидемиялия мюхчан баву мурадрайсса давуртту чялиш дуккан дан багьлай бур. Цуксса кьурчIинугу, къашавай хъанай бур оьрмулул бугьараминная тIайла хьуну, чIаваминнайн бияннинсса инсантал. ЧIявусса инсантураща ва азарданул лишанну ччя­сса мутталий кIул дан къахъанай дур. Коронавирусрал агьаммур лишангу дур чурххал температура лахъ шаву. Волонтертал бур Дагъусттаннал ва Чачаннал дазурдайхчIин букIлакIисса щупиртурал температура ххал дуллай.

Нажагьлий лахъсса температура дусса инсан аьл­тту хьурчан, анаварсса мутталий Республикалул Роспотребнадзорданийн баян буллай бур. Щупиртурахьгу маслихIат буллай бур, мугьлат бакъа медициналул идарарттайн лавгун, цIуцIаву хъин дан.

Оьрмулул бугьара хьусса инсантал, бюхъайссаксса цала ичIува бавцIуну, бурувччуну бикIан аьркинссар. Миннан аьркинсса даруртту ва дуки-хIачIия ларсун бучIавантIиссар волонтертал.