ЛичIлулшиву чан хьун мадитару

Лакрал райондалул администрациялий хьунни райондалул бакIчинал батIаву. Муний гьуртту хьунни райондалул азарханалул хъунама хIакин АьбдурахIин Дибиров, Аьрасатнал МВД-лул «Лакский» МО-лул каялувчи МахIаммад Рамазанов, райондалул прокурорнал буржру биттур буллалисса Аьраби Оьмаев ва идарарттал хъуними.


Зулайхат Тахакьаева
БатIаврий ххал бигьлагьи­сса яла агьаммур суалну бия Республикалул БакIчинал буржру ч1умуйнусса биттур буллалисса Сергей Меликовлул коронавирусрал инфекция ппив шаврия мюхчан хьунсса чараннал ялувсса Указ биттур баву.

Райондалул бакIчи Юсуп МахIаммадовлул идарарттал каялувчитурайн тапшур бунни, идарартту маскардал дузал бувну, маскарду лаххаву тIа­лав дан. КIицI лавгунни, щалва билаятрай маскарду къалархсса инсантурай аьчIа дихьлан тIалав бувну бухьурчагу, низам дуруччай органнал зузалтрахь маслихIат бувшиву ва нюжмардий, аьчIагу къадирхьуну, миннащал маз лякъинсса давур­тту дуллан, гихуннай тIурча, яла чара бакъа низам дуручлан.

Бувсунни детсадирттан арцу итадаркьуну душиву гьава марцI байсса циркуляторду машан ласун.
Райондалул азарханалул хъунама хIакин АьбдурахIин Дибировлул бувсунни коронавирусрал къашавайминнал аьдад азарханалий яларай дагьарчагу, гьарца кьини цая-кIия инсан цIуну укIлакIисса чан хъанай акъашиву. Тагьар зурул ахирданийннин даххана къахьурча, азархана цIунилгу ковид-центрданийн кIура баен бюхъайшиву. Бувсунни, Республикалул ЦIуллу-сагъшиву дуруччаврил министерствалул щаллу дурну, азарханалий душиву шанма зуруй биял хьунсса дарурттал ва СИЗ-ирдал луртан.

Ванал бусласимунийн бувну, пандемия дайдирхьуния шинай райондалий къашавай хьуну усса ур 463 инсан. Миннава 350 хъин хьуну ур стационарданий, 250 къашайшалай ляркъуну дур коронавирус. ИвкIуну ур пневмониялул къашавайсса кIия инсан.

Райондалул каялувчитурахь маслихIат бунни коронавирус сававну шаппа щябикIан багьсса инсантал дукиялул ва чара бакъа аьркинмунил дузал бан. Къашавай хьусса инсантурахь маслихIат буллай ур, цIуцIаву цайминнайнгу къала­хъан, поликлиникалийн къалавгун, хIакиннайн шаппай оьвчин. Хъунама хIакиннал бувсунни Да­гъусттаннай ттигу байбишин бувану бушиву вакцина буллай.

Республикалул ЦIуллу-сагъшиву дуруччаврил министерствалул тIалав дуллай бусса бур цала хушрай вакцина бан ччисса инсантурал сияхI.
БатIаврий хьусса ихтилатир­ттал жям дуллай, Юсуп МахIам­мадовлул тавакъю бунни агьалинахь, коронавирусрал инфекция сававну билаятрай хIасул хьусса тагьарданух биччиба­къулшиву къадурну, цал ххишала личIлулну бикIан.