Маскарду ларххун бурув-бакъарув?

Дагъусттаннал БакIчинал бигарду щаллу буллалисса Сергей Меликовлул хIукмулийну щалагу республикалий зузи дурну дур маскарду ларххун занансса режим. Укунсса хIукму бувну бур коронавирусрал инфекциялул къашавайми чIяву шаврийн бувну.


Андриана Аьбдуллаева
Октябрь зурул 28-нний ЦIу­ссалакрал райондалул бакIчи МахIаммад-ХIажи Айдиевлул сипталий ххалбигьавуртту дурну дур райондалий баян бувсса тIалавшинна цукун щаллу дуллай бурив ккаккан.

Ххалбигьавурттаву гьуртту хьуну бур ЦIуссалакрал ОМВД-лул хъунама Шакир Нахаев, райондалул бакIчинал цалчинма хъиривчу Султан ХIамзатов, балугъравун къабивминнал иширттал­сса буллалисса отделданул хъунама Исрапил АьбдурахIманов.
Вайннал ххал бунни жяматийсса транспортрай, ттучаннай, аптекарттай, дуккаврил ва цаймигу идарарттай агьали маскарду ларххун бурив-бакъарив. Ялун ливчунни жяматийсса транспортрал шупIиртал маскарду ларххун бакъашиву. Миннал хIакъираву административ протоколлу бунни. Ва бакъассагу, ГИБДД-лул зузалт бия машинартту бацIан буллай, шупIиртуран цайра транспортрал налог душиву дакIнийн бутлай.
Райондалул бакIчи цува ия аьрххи-ххуллийн бувкминнан маскарду лаххан аьркиншиву, мунийну цивппагу, цала оьрчIругу коронавирусрал инфекциялия мюхчан хьунтIишиву бувчIин буллай.

Ххалбигьавуртту дуллалими райондалийсса цинявппагу ттучаннал ялтту бувккунни. Диялдакъашивуртту дукьан дан тапшур бунни.
Райондалул бакIчинал тIалав­шинна дунни дуки-хIачIия дахлахисса мюрщи ттучаннаву кассалучIа салфеткардащалсса къуршив бишин, муштариначIа маска дакъахьурча, салфеткалух лажин лакьиншиврул. Региондалий зузи дурсса низамрайн бувну, даххултрахь ва кассиртурахь ихтияр дакъар маска дакъасса клиентнащал зун.

Ттучаннал зузалтрал бувсунни гьарица кIира ссятрал дянив ттучаннай дезинфекция дайшиву. Му бакъассагу, клиентътурал термометрия дайшиву.
Райондалул бакIчинал ва архIалминнал ххал бунни ЦIу­ссалакрал шяравусса цинявппагу идарартту. Агьалинащал зузисса инсантуран цинявннан аьркинссар маскарду ва катIри лаххан, каруннай дезинфекция дуллан. Маскалул чара бакъа бахьлаган бувну бикIан аьркинссар кьацIгу, майгу.

МахIаммад-ХIажи Айдиевлул цал ялагу оьвчаву дунни райондалул агьалинайн мюхчан хьун­сса чаран лякъияра, пандемиялул тагьар къулай хьуннин жяматийсса кIанттурдай маскарду ларххун заназияра куну.

– ТIалавшинна щаллу къадурсса инсантурал хIакъираву полициялул зузалтрал щаллу бантIиссар административ протоколлу, – увкунни ванал.