Ноябрьданул 11-нний ДР-лул БакIчи Сергей Меликовлул муниципал сакиншиннардал бакIчитуращалсса батIаврий бувсунни региондалул БакIчинал ва ХIукуматрал Администрациялул ва республикалул министртурал кабинетрал къуллугъчитал баххана баврил хIакъираву.
Хушрай къуллугърая лавгун ур ДР-лул БакIчинал ва ХIукуматрал Администрациялул Каялувчи Владимир Иванов. Му къуллугърай ивтун ур Алексей ХIасанов. Му зий ивкIун ур личIи-личIисса къуллугъирттай ДР-лул БакIчинал ва ХIукуматрал Администрациялийгу, АьФ-лул Президентнал СКФО-райсса вакилнал аппаратравугу.
«Ттул пикрилий, мунаща бюхъанссар хъинну дачин дуван му къуллугърал давуртту», – кунни республикалул каялувчинал.
Хизри Абакаров ДР-лул паччахIлугърал секретарьну итаврил хIакъираву бувчIин буллай, ДР-лул БакIчинал бувсунни мунал цува ккаккан увну ушиву хъунисса экономикалул ва социал проектру бартдигьаврил чулуха. Махъсса шиннардий мунал чIалачIи бувну бур цува лайкьсса каялувчи ушиву.
Цаппара дахханашивуртту хьуну дур региондалул ХIукуматравугу. Цува укьан рязину къуллугърая лавгун ур ДР-лул ХIукуматрал Председательнал Цалчинма хъиривчу ХIажимахIаммад ХIусайнов. Му къуллугърай ивтун ур хьхьичIва ДР-лийсса Росимуществалул управлениялул каялувчину зий ивкIсса АьбдулпаттахI Амирханов. Му итаврил хIакъираву Сергей Меликовлул тIимунийну, АьбдулпаттахI ХIажиевич хъунмасса хIаллай зий ивкIун ур АьФ-лул Ухссавнил Ккавкказуллал иширттал министерствалий, яла личIи-личIисса федерал органнавугу. Умуд бур мунал хъинну бартбигьланшиврий цайва бивхьусса масъалартту.
Сергей Меликовлул мукунма бувчIин бунни ДР-лул БакIчинал ва ХIукуматрал Администрациялуву хьусса дахханашивурттал хIакъиравугу: чан бувну бур кIия хъиривчунал къуллугъирттавасса ца къуллугъ. Цува рязину къуллугърая мурахас увну ур Артур Исрапилов. Мува хIукмулийну цачIун бувну бур Виваллил политикалул управление ва КIанттул цилакаялувшиврул масъаларттал управление. Миннун кIанай бувну бур Виваллил политикалул ва кIанттул цилакаялувшиврул масъаларттал управление, мунил бакIчину ивтун ур Кьурбан Нажмуттинов.
