Ларгсса итникьини, ноябрьданул 16-нний, Дагъусттаннал муфти, щайх АхIмад- хIажи хьунаавкьунни республикалул азан учаврил II-мур конкурсрай ххув хьусса МухIаммад- Наби Буттаевлущал. Ва хьунабакьаврий гьуртту хьунни муфтинал хъиривчу МухIаммад Майранов ва Лакрал ва Ккуллал районнал Имамтурал советрал хъунама Шамил БахIандаьлиевгу.
МухIаммад-Набинал ххувшаву барчагу дуван, лайкьсса тарбиялухлу барчаллагьгу учин оьвкуну бия ванал ниттийн ва буттайнгу.
Бусанну МухIаммад-Наби Ххутиятусса ушиву, МахIачкъалалив увсса ва хъуна хьусса ушиву. Ва дуклай ур ИстIамуллал хIапизтурал школалий. Уттигъанну МахIачкъалалив хьусса республикалул азан магьирну учаврил конкурсрай ванал цалчинмур кIану бувгьуссар. Ва конкурсрай 120 инсан гьуртту хьуссар. МухIаммад-Набинащалсса ихтилат бикIантIиссар «Илчилул» хъиривмур номерданий.
