Ноябрьданул 29-нний ДГТУ-лул Ттизаманнул информациялул технологиярттал центрданий чичинтIиссар щалва Аьрасатнал географиялул диктант. Ва акция дуллай гьашину ххюра шинни.
Акциялул мурадгу бур аьрасатлувтурал дяниву жулва билаятрал географиялул кIулшивуртту машгьур дансса, миннул даража лахъ бансса ва ми лахьхьаврих гъира бутансса. Ларгмур шинал кIулшивуртту дулаврил ва акциялий гьуртту хьуну ур 420 азара инсан. Миннава онлайн-режимрай диктант чирчуну дур 100 азара инсаннал.
Аьрасатнаву дакъасса, диктант ларгми шиннардий чирчуссар 106 чил хIукуматрайгу. Дунияллул циняв континентирттай дакъа, диктант чирчуссар Халкьуннал дянивсса космический станциялийгу.
Гьашину акциялул официал сайтрай баян бувну буссия «Географиялул диктантрайн вила суалгу чича» тIисса халкьуннал конкурс. Агьалинал буллусса 430 суалданува язи бувгьуну яла ххуйсса 18 суал бувтун бур цIана чичинмур диктантравун.
Диктантрал гьарца вариант 40 суалдания сакин дурну дикIантIиссар. Шикку аьркин хьунтIиссар гьурттучинал логикагу, куртIну пикри бан бюхъаврил гьунаргу. Акциялул гьарца гьурттучинан диктант чирчуну махъ дулунтIиссар хасъсса сертификатгу.
Диктант чичинтIиссар Имам Шамиллул цIанийсса кучалийсса № 70 ДГТУ-лул идаралий, гьурттучитурал цIуллу-сагъшиву дуруччинсса циняр шартIругу дузал дурну.
