Ларгсса бигьалагай кьини, ноябрьданул 15-нний, Гъумук хьунни агьамсса иш – цIусса мадраса тIивтIунни Гъази-Гъумучиял щайх Жамалуттиннул цIанийсса. Мадраса тIитIаврил шадлугърайн МахIачкъалалия ва цаймигу шагьрурдая бувкIун бия хъамал. Шадлугърайн бавтIцири барча буллалисса ихтилатру бувна Дагъусттаннал муфтиятрал вакилтурал – АхIмад Кахаевлул, МухIаммад Майрановлул, Аьбдуллагь Салимовлул ва цайминналгу . Шадлугърай гьуртту хьуна Лакрал ва Ккуллал районнал Имамтурал советрал каялувчи Шамил БахIандалиев, лакрал шяраваллал имамтал, «Вирттал» тIисса Лакрал жагьилтурал ккурандалул каялувчи Давуд Амиров ва цаймигу бусравсса инсантал.
Аьлимтурал цалва ихтилатирттаву кIицI лавгуна исламрал кIулшивуртту куртIгу, цIакьгу дувавриву, оьрчIру ва жагьилтал тIайласса исламрал ххуллийн кIункIу бувавриву мадрасарттал бияла хъунмасса бушиву. Мадрасалуву дуклакиминнан ххуйсса шартIру дузал дурну дур: гъилисса классру, гьантта бикIайсса ххуйсса къатта, украсса дукра. Шиккува дакIнийн бутан ччива хьхьичIва Гъумук бивкIшиву та заманнай Аьрасатнаву исламрал дуккаврил заведениярттаяр ссалчIав къалувсса мадрасартту.
Жулва мадрасарттаву кIулшивуртту ларсъсса мюталимтурая машгьурсса динчитал хьушиву. Ва мадраса савав хьуну зана бикIаннав Дагъусттаннай бакъагу, щалва Ккавкказнаву тарихрал, рувхIанийсса кIулшивурттал ва культуралул кюруну бивкIсса Гъумукун барачат, чIяву хьуннав миллатраву Аллагьнал ххуллу-ххуттай цIакьну бавцIусса наслугу, цIа машгьурсса аьлимталгу.
