Уссал цех зузи бан икьрал чирчунни

ЦIуминалийсса ЦIуссалакрал шяраву «ДАНИК» тIисса уссал цех зузи бансса икьрал чирчунни вай гьантрай ЦIуссалакрал райондалул бакIчи МахIаммад-ХIажи Айдиевлул ва ишбажаранчи Сундар Шабановлул. Цех тIитIаврил хIакъиравусса хьунабакьаврий гьуртту хьунни ЦIуссалакрал райондалул бакIчинал цалчинма хъиривчу Султан ХIамзатов, ЦIуссалакрал шяраваллил бакIчи Сулайман Рамазанов, райондалул администрациялул экономикалул отделданул хъунмур Жамиля ХIусманова , уссурвал Сундар ва Муслим Шабановхъул.


Уссал цех тIитIин тIий бур ЦIуссалакрал шяравусса бух­сса школалул къатраву. Шикку бикIантIий бур 50 инсан зун­сса кIанттурду. ЦIанасса чIумал къатри бакьин буллай, зунсса шартIру дузал дуллай бур. Баян бувну бур учениктал ва зузалт аьркинну бушиву. Цинявппагу даврийн кьамул буллалиминнащал чичин тIий дур захIматрал икьраллу. Гьарица зуруй бюджетравун дичлан тIий бур налогру. Цех зузи баврил хIакъиравусса икьрал цалсса ххюра шинайсса чирчуну дур.

Хьунабакьаврий ххал бивгьунни цех тIитIинсса къатри бакьин баврил, цех зузи баврил ва зунсса инсантал лякъаврил масъалартту. Шикку дурсса усру дикIантIиссар качествалул ххуйсса ва ххира да­къасса. Ми хьхьичIра- хьхьичI дуккан дантIиссар Дагъусттаннал рынокрайн. Райондалул хъуниминнал къулайсса шартIру дунни цех зузи бан ччиминнан.