[dropcap]Н[/dropcap]оябрьданул 23-нний ДР-лул Культуралул министерствалий хьунни ялун нанисса шинал жулла республикалий кIицI лагантIисса ДАССР-нул 100 шинал юбилейран хас дурсса батIаву. Му дачин дурну бия ДР-лул культуралул министр Зарема Буттаева.
БатIаврий ххал бивгьунни юбилейрал лагрулий дувантIисса элмулул, кIулшивуртту дулаврил ва спортрал шадлугъирттацIун бавхIусса масъалартту. Ва иширацIун дархIусса шадлугъру хьунтIий дур жулла республикалул шагьрурдай ва шяраваллаву, хаснуварив кIицI лаган тIий бур Буйнакск шагьру – ДАССР-нул тарихрал чIапIив чичлай байбивхьусса.
Юбилейрал шадлугъирттал агьамми майданнурив бикIантIиссар Каспийск шагьрулий Аь. Аьлиевлул цIанийсса спорткомплексраву ва МахIачкъалалив М. Горькийл цIанийсса Оьруснал театрдануву. Миннуй гьуртту хьунтIиссар жулва билаятрал личIи-личIисса регионнаясса бусравсса хъамалгу.
Юбилейрал шадлугъру хьунтIиссар къулай дакъасса эпидемиологиялул тагьардануцIун дархIуну Роспотребнадзорданул дуллалисса циняр тIалавшиннарду ва маслихIатругу хIисавравун лавсун.
