Вайннал ххувшаву цинявннал аьмсса ххаришивур

Ноябрь зурул 9-нний ЦIуссалакрал райондалул бакIчи МахIаммад-ХIажи Айдиев хьунаавкьунни «Хъунна перемена» тIисса щалвагу Аьрасатнал конкурсрай ххув хьусса дуклаки оьрчIащал.


КIицI лаганну, ва конкурсай хьхьичIунсса кIанттурду бувгьусса дагъусттанлувтурава шама лак, миннава кIия оьрчI ЦIуссалакрал райондалиясса бушиву.
Конкурсай ххув хьусса Хутиев АсхIаб ур ЦIуссалакрал 1-мур школалий 2-мур классраву дуклакисса. Суперфиналданий АсхIаб Хутиев авторсса уттизаманнул культуралун ва творчествалун хас дурсса «Искусство в кармане» тIисса проектран бивщунни лавайсса кьимат.

Даниял Шабановлулмур проект хас дурну дия Аьрасатнаву уттизаманнул искусство ва творчества хьхьичIуннай даврин. КIинналвагу биялсса баллу лавсун, суперфиналданий вайннан дуллунни 1 млн арцунсса сертификатру.
Райондалул бакIчинал суперфиналистал барча буллалисса мажлисрайн оьвкунни оьрчIал нитти-буттайнгу. Мукунма, ва кьинисса хьунабакьаврийн оьвкуну бия Шабанов Данияллул ттаттайн, музыкалул учитель, машгьурсса музыкант Даниял Жабраиловичлуйн.

Лахъа-хъунну, шадлугърал даражалийсса мажлисрай МахIаммад-ХIажи Айдиевлул ва райондалул КIулшивуртту дулаврил управлениялул хъунмур Светлана Къудаевал барча бунни суперфиналистал, дуллунни хIурматрал грамотартту, бахшишран буллунни ноутбукру ва вайннал нитти-буттангу буллунни тIутIал кIацIру ва барчаллагьрал чагъарду.
– Зул оьрчIал цал утти­гу тасттикь бунни цивппа куртI­сса кIулшивуртту дусса, захIматшивурттаща нигьа къабувсуну цала хьхьичI бивхьусса мурадру биттур бан бюхъайсса даражалийн бивсса бушиву. ЦIанихну дуклакисса цикссагу Аьрасатнал оьрчIащал данди бувккуну, вайннал жулла райондалул школарттал ва щалвагу Дагъусттаннал цIа бюх­ттул дунни.

ХIакьинусса ва ххувшавугу хъунмурчIин зул кумаграйнур ларсъсса, барчаллагь зун, оьрчIал цIаний бивхьу­сса хъунмасса захIматрахлу. Зу мудан чIарав бацIлайтIийри дакI дарцIуну ва кьянкьану зул оьрчIругу хьхьичIунмай хъит тIутIисса. Щак бакъар, вайннал гихуннайгу уттигу цикссагу ххувшавуртту ласланссар тIий. Ва ххувшавугу жула цинявннал аьмсса ххаришивур, – тIисса махъру чивчуну бур райондалул бакIчинал чулухасса Барчаллагьрал чагъардний.

Конкурсрай цалла дурсса гьурттушиврия, проектирдая ва дакIния къабуккайсса асардая бувсунни АсхIаблул ва Данияллул, кIицI лавгунни ччан бикIарчан, дан къабюхъайсса цичIар дакъашиву. Цалва ихтилатраву МахIаммад-ХIажи Айдиевлул кIицI лавгунни цува пахрулий ушиву дуккаврих гъира-шавкь дусса, эбратран­сса дуклаки оьрчIру райондалул школарттай бушиврия.
Вайннал исват бунни так кIулшивурттайну бю­хъан­тIишиву чаннасса бучIан­тIи­мунийн умуд бишин, – увкунни МахIаммад-ХIажи Айдиевлул.

«Хъунна перемена» тIисса конкурсравух гьуртту хьуссар щалвагу билаятраясса ца миллиондалия ливчусса дуклаки оьрчIру. Конкурс най дуссия «Артек» тIисса дунияллул халкьуннал оьрчIал центрданий. Ши­кку видеоконференциялийхчIин финалистуращал хьунаавкьуну, ихтилатру бувссар Аьрасатнал президент Владимир Путиннул.

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: