Ноябрьданул 15-нний ДР-лул БакIчи Сергей Меликовлул МахIачкъалалив ххал бивгьунни цаппара буллалисса ва зузисса идарартту. Республикалул бакIчинащал архIал ивзунни ДР-лул БакIчинал ва ХIукуматрал Администрациялул Каялувчи Алексей ХIасанов, ДР-лул ХIукуматрал Председательнал хъиривчу Инсаф Хайруллин, республикалул министерстварттал ва ведомстварттал, МахIачкъалаллал администрациялул каялувчитал.
Сергей Меликов увкIунни Ипподромрал микрорайондалийсса оьрчIал садик ххал буван. Му бувну бур 2018 шинал, амма, цаппара диялдакъашивуртту ляркъуну, объект кьамул къабувну бивкIун бур. Дагъусттаннал каялувчинал Салман Дадаевлуйн тапшур бунни анаварну дукьан дуван диялдакъашивуртту.
Сергей Меликовлул ххал бивгьунни цIуну буллалисса «Лезгинка» ансамбльданул къатри. Республикалул каялувчинал тапшур бунни давуртту анавар дуккан дуван.
Яла Сергей Меликов увкIунни Ися Идавсил РувхIанийсса центрданийн ва Виртталсса хIакинтурал халкьуннал аллеялийн. Микку мунал ххал бивгьунни буллалисса МухIаммад Идавсил () мизитрацIунсса комплекс ва цаймигу социал объектру.
Муния махъ ДР-лул БакIчи ивунни республикалул кказитирттал ва журналлал комплекрайн. Микку Дагъусттаннал информатизациялул, дахIаврил ва агьалинайнсса коммуникациярттал министр Сергей Снегиревлущал цачIу ххал бивгьунни ГЖК-рал масъалартту.
Яла Сергей Меликовлул ххал бивгьунни «Ак-Гель» бяр ва мунил лагмасса кIанттурду. ДР-лул тIабиаьтрал луртаннал ва экологиялул министр Набиюлла Къарачаевлул бувсунни бярув щин чан къахьуншиврул дуллалисса давурттал ва миккусса паркрал лагмасса кIанттурдай дузалшинна даврил хIакъираву.
ДР-лул БакIчи увкIунни Дагъусттаннал паччахIлугърал филармониялул тагьар ххал дан.
Сергей Меликовлул ххал бунни Сулайман Стальскийл цIанийсса бульвар ва Буйнакскийл цIанийсса куча. Яла ххал бивгьунни шагьрулул каялувчинащал цачIу кучарду дузал баврил масъалартту.
