«Вирттал» тIисса Лакрал жагьилтурал ккурандалул кумаг був­ссар 5 азарунния ливчусса Дагъусттаннай­сса ва цайми регионнайсса кулпатирттан, мукунма жула районнайсса азарханардан. Кумагран рартIссар 3,5 миллион арцул

---

Андриана Аьбдуллаева
[dropcap]Ш[/dropcap]икку гьуртту хьунни Дагъус­ттаннал миллатрал политикалул ва диндалул иширттал министр Энрик Муслимов, Дагъусттаннал жагьилтурал иширттал министр Камил Саэдов, «Вирттал» тIисса лакрал жагьилтурал ккурандалул председатель Давуд Амиров. Ванал бунни кIицI ларгсса акциялул хIасиллу дуллалисса ихтилатгу. Хъирив ккаккан дунни акциялул лагрулий дур­сса давурттаясса видеороликгу.

Ихтилатру бунни Энрик Муслимовлул ва Камил Саэдовлул. Вайннал барчаллагь увкунни лакрал жагьилтурал ккурандалул волонтертурахь коронавирусрал пандемиялул чIумал ахIвал кIюласса, чIявусса оьрчIру бусса кулпатирттан, мукунма кьатIув буккан къахъанахъисса бугьарасса инсантуран бувсса кумаграхлу, захIматсса чIумал ккаккан дурсса чувшиврухлу ва граждан позициялухлу.

— Зугу та ппурттуву, хIакинтал кунма, оьрмулун ва цIуллу- сагъшиврун нигьачIаву ду­сса шартIирдай зий бивкIссару, ятIул зонардай бивкIшиврун ккаллиссару. Жула халкьуннал та 1999-ку шинал кунма цал ттигу ккаккан бунни бала ялун бивсса чIумал жува миллатрах, диндалух къабурувгун цачIун шайшиву. Зу кумаг був­ссар Дагъусттаннал халкьуннан бакъасса, цайми республикардайсса ва регионнайсса кулпатирттангу. Зу дурсса даврин багьа бищун къашайссар,-увкунни Энрик Муслимовлул.

Хъирив кIиягу министрнал дуллунни волонтертуран ва спонсортуран наградартту — ОНФ- лул ( Общероссийский народный фронт) исполкомрал каялувчи М. Кузнецовлул, Волонтертурал центрданул Ассо­циациялул советрал председатель А. Метелевлул, «Волонтеры- медики» Аьрасатнал суккушиндарал председатель П.Савчуклул чулухасса барчаллагьрал чагъарду. Ккурандалул давриву чялишсса гьурттушинна дурну тIий нагу лайкь хьура ва наградалун.

Ахирданий Давуд Амировлул барчаллагь увкунни цала дуллалисса даврин арцуйну, дуки- хIачIиялийну хъунмасса кумаг бувсса спонсортурахь: ХIажикьурбан Аьб­дурахIмановлухь, Анвар ХIа­жиев­лухь, Cтанислав МахIам­мадовлухь, СалихI Сагидовлухь. Ванал баян бунни «Вместе сможем» цIанилусса чирилул фонд тIитIлатIишивугу.

ДакIнийн бутан, щалагу Аьра­сатнаву нанисса «Мы вместе» цIанилусса акциялувух хIала бувххун, «Вирттал» тIисса Лакрал жагьилтурал ккурандалул кумаг бувссар 5 азарунния ливчусса Дагъусттаннайсса ва цайми регионнайсса кулпатирттан, мукунма жула районнайсса азарханардан. Кумагран рартIссар 3,5 миллион арцул.

Хьхьу-кьини къаувкуну горячий линиялий зий ивкIссар кIия оператор. АцIва машиналий 50 волонтер занай ивкIссар мюхтажсса кулпатирттан дуки-хIачIия диян дуллай. Ва ба­къассагу, пандемиялул чIумал Лакрал жагьилтурал ккурандалул сакин бувссар кIива конкурс: Хъунмасса Буттал кIанттул цIанийсса дяъвилий Ххувшаву ларсун 75 шин шаврин хас був­сса пасихIну шеъри буккаврил ва Рамазан зуруцIун бавхIуну Кьуръандалул аятру буккаврил. КIивагу конкурсрай ххув хьуми шадлугърал даражалий барча бувссар Родопский бульварданий.