[dropcap]В[/dropcap]ай гьантрай ЦIуссалакрал райондалул администрациялул бакIчи МахIаммад-ХIажи Айдиев ва ванал хъиривчу Султан ХIамзатов хьунабавкьунни райондалул щархъавун заназисса маршруткардал щупиртуращал. Хьунабакьаврий райондалул бакIчинал тIалав бунни, пандемиялул тагьар ягин хъанай дайдишаврийн бувну, пассажиртурал ва щупиртурал маскардал режим дуруччаву. Мунийн бувну щупиртал ва пассажиртал маршруткардаву бикIан аьркинссар маскарду ларххун.
Имара Саидова
МахIаммад-ХIажи Айдиевлул райондалул Оператив штабрая тIалав бунни щупиртал ва маскарду дакъа маршруткардавун бухлахисса пассажиртал маскардал щаллу баву. Пассажиртуран щупиртурал бувчIин буллан аьркинссар инсантал бусса кIанттурдай маскарду дакъа занан къабучIишиву.
Мукунна гьарица транспортраву зунтIиссар коронавирусрал инфекциялия бурувччуну бикIансса ва Роспотребнадзорданул ва эпидемиологтурал тIалавшиннарду дуруччинсса куц бусласисса радиортту.
— Цума-цагу инсан цалла цIуллу-сагъшиврул ялув авцIуну икIан аьркинссар. Жунмавагу къакIулну, вирусрал лишаннурагу дакъа дуна, бюхъайссар жуяра цайми инсантурайн инфекция лахъангу. Мунийн бувну, хаснува оьрмулул бугьарасса инсантал бурувччуну бикIан аьркинссар. Маскардал режим гужлан давугу, эпидемиялул тагьар гужлан шаврийн бувну, инфекция ппив хьун къаритаву мурадрайсса дур. Агьалинал тIалавшиннарду биттур дулларчан жува, хьхьичIава кунма, графикрава къабувккун, дайшишру дакъа, жулла давурттай зунтIиссару. Му бакъассагу, ттучаннай, транспортраву ва инсантал бухха-буккайсса цаймигу кIанттурдай ххал дигьлантIиссар маскардал режим цукун дуручлай буссарив. Вай цимурца агьалинал цIуллу-сагъшиву дуруччаву мурадрай дуллалиссар», — увкунни Айдиевлул.
