Вай гьантрай Аьрасатнал КIулшиву дулаврил министерствалул дунни, сентябрь зурул 14-нния октябрь зурул 10-ннийн, Учительнал кьинилун хасну баян бувну бивкIсса «Мой учитель» тIисса Щалвагу Аьрасатнал акциялул хIасиллу.
Зулайхат Тахакьаева
Шаназарунниха ливчусса дуклаки оьрчIру гьуртту хьуну бур ва акциялувух. Цала учительтуращал рирщусса суратру ва миннахь байран барча тIутIисса видеороликру дуклаки оьрчIал дирхьуну дия «Инстаграм», «ВКонтакте» и «ТikTok» социал сетирдай. Цала насихIатчитуран миннал хас бувну бия балайрду, шеърирду, къавтIавуртту.
АцIра язисса барча баву личIи дурну дур финалданийн. Миннул автортуран булунтIий бур дипломру. Шанма хьхьичIунсса кIантту бувгьуминнан дуллуну дур бахшишру.
Акциялий ххув хьуну бур Дарбант шагьрулул 15-мур школалул 3-мур классрал дуклаки душ, Аьйша Буттаева.
Роликраву Аьйша лавайсса хIурматрай ва барчаллагьрай буслай бур цила учительницая, Жяъпарова Лариса Аьлимирзаевная. КIилчинмур кIану бувгьуну бур Красноярскаллал крайрал Енисейллал школалул дуклаки оьрчIал. Шамилчинмур кIану бувгьуну бур Астраханнал областьраясса оьрчIал.
Ххув хьуминнал давуртту дагьну дур конкурсрал жям дуллалисса роликравун, цувгу дирхьуну дикIан тIий дур Аьрасатнал КIулшиву дулаврил министерствалул официал аккаунтирттай.
