Яла баламур вирус дур баччибакъулшиву

Яла баламур вирус дур баччибакъулшиву

Махъзуманив гьар кьини нара дувайсса ва дукъарну бацIан къашайсса давур — коронавирусрал Дагъусттаннай цими къашай хьуну урив ххал уваву. Статистика дуссар ттул смартфондалул экрандалийра. Оператив штабрал ахттайн бизаннин даххана дувай гьар кьини цифрарду: къашай хьуминналссагу, ливтIуминналссагу. ХIакьину, сентябрь зурул 21- нний, бурувгра: лахьхьугу ххюя инсан ивкIуну ур, хIакьинугу.

ПатIимат Рамазанова
ЛивтIуминнал аьдад хIисав дурну, Дагъусттан мукьилчинмур кIанттай бур Аьрасатнаву. Мегаполисирттал Москавуллал ва Санкт-Петербургуллал областирдал хъирив чIявусса ливтIусса бур Свердловскаллал областьрай – 568, хъирив – жучIава Дагъусттаннай — 552 инсан. Ва пасатсса азарданул цаягу инсан къаивкIусса регионнугу дур. Масалдаран, Ненецкий округ ва Сахалин. Чукоткалийгу ивкIусса кIия инсан ур.

Жунма чивчумур чин къабу­чIайссар учару, амма…Жува жулва лагма- ялттуминнал хIур­мат бакъасса, жулва жувагу, цаймигу буруччин къаччисса агьлу буру. Азар гьалак дурксса ппурттуву хьунав на Москавлив, гьар ттучандалий, гьар идаралий, гьар кIанай , метрордаву дия санитайзерду. Цирдагу автоматикалул кьяйдалий зузисса — укра­сса. Гьарца станциялийн буххайхту, гъан дува кару дезинфекция дуван сенсорданул санитайзерданийн, аьркинссаксса порция антисептикрал датчикрал цилва булунтIиссар. Супермаркетирттавугу инсантал кIира- шанна ххарххилул архну бавцIуну бия кассалучIа ссавурданий. ЖучIава кунма, гуржи- кьютIу дурну, ялун бивгьуну най бакъар. Чун- бунугу бухларча, маска дакъахьурча, хьулухра дуллай бия. Тайксса чIявусса агьлу бусса мегаполисрай низам дур.

ЖучIара супермаркетирттаву багьандаран дур антисептикрал къутив. Миннух ургай­сса акъар. Ци тахсирнур жучIава чIявусса агьлу литIлатIисса? БувчIлай бур, урша гъавгъуну, щин экьиларгни кунма­сса иш бушиву. Школартту, садикру, вузру сантирай къазий пайда бакъар, инсантал давурттай къазий пайда бакъар. Оьрму цила ххуллийх най бур, вирусру ва бивкIурдугу хIалану. Так циванну жува буван шаймурвагу къабуллалисса, жуйра дакI цIуцIаву дуну къуццу къатIисса? Инсаннал оьрмулияр язиссагу, хьхьичIунссагу цичIар дакъар дунияллий. Так чIалай бакъар инсан уруччинсса, ххассал увансса хъитгу, хIарачатгу. Яла пасатмур вирус — му баччибакъулшиврул вирус дур. Балагу мичча най бур, миккунма занабикIлайгу бур. Пикри бувансса, хIисавравун ласун­сса цайми ишругу, кIанттурдугу бур.

Читайте также: