Сергей Меликовлул кьимат бивщунни ЦIуссалакрал райондалий дуллалисса давурттан

Дагъусттан Республикалул БакIчинал бигарду щаллу буллалисса Сергей Меликовлул ЦIуссалакрал райондалийн увкIун унува ххал бунни цIуну буллалисса ва зузисса социал объектру. Ванащал бия Дагъусттан Республикалул ХIукуматрал ва БакIчинал администрациялул каялувчи Владимир Иванов, ЦIуссалакрал райондалул бакIчи МахIаммад-ХIажи Айдиев, Халкьуннал Мажлисрал депутат Амирхан Амирханов, проектрал жяматийсса координатор Рукьият АхIмадова.


Шиккува бусан, гьашину «Комфортная городская среда» программалийн бувну, ЦIуссалакрал райондалий, ЦIуссалакрал (9500 кв. м) ва ЦIуссаккуллал (6000 кв.м) шяраваллаву буллай бу­ссар паркру. Ми бансса арцу итадаркьуну дур федерал ва республикалул бюджетирттава, мукунна райондалул ва шяраваллал бюджетирттава. Вай шяраваллаву бантIиссар инсантал сайрданий буккайсса, бигьалагайсса, оьрчIру бялахъан байсса къулай­сса шартIру дусса паркру. ЧIал къавхьуну паркирдаву бугьантIиссар мурхьру, щюллишиврул къатIри ва тIутIив. Ми давурттаву хъуннасса гьурттушинна дантIий бур шяраваллал жяматиртталгу.

Му бакъассагу, парк чIюлу баврил давурттавух хIала буххантIий бур спонсортал ва меценатътал. Ца паркраву вайннал кумаграйну тIитIин дакIний бур фонтан. Сергей Меликовлул цIухху-бусу бунни оьрчIансса спортрал площадкартту дузал бансса кьай-кьуй ча ласлай буссарив. Ванахь бувсунни ми цаппара, масалдаран, спортрал тренажерду, республикалул кьатIату дучIан дайшиву, жагьилтурал спортрал площадкалун аьркинмур ва беседкартту тIурча, ласайшиву жула республикалул производительтураща.- — -Паркирдан итадаркьусса аьрщив диялсса дур. ЧIивисса бакъар ми дузрайн буккан баврин бивхьу­сса харжгу. Ххуйну хьунссия шикку инсантурал арцу лякъинсса шартIру дузал дарчангу, масалдаран, тIитIирчан кафе, дулларчан шикку ярмаркарду.

Шикку бюхъантIиссар агьалинаща чIири-хъунсса байранну, мероприятиярду, миллатрал кьинирду дуллан. Мунийну лякъин хьунтIиссар парк чIун-чIумуй цIубуккан буллансса ва бакьин буллансса арцу. Жула Президентгу мудан ур дянивмур ва чIиримур бизнес лядуккаврин кабакьу бара тIий. Да­гъусттаннал инсантуран ччатI лякъин укунсса бизнес чара бакъа аьркинну дур,- увкунни Сергей Меликовлул.

Ванал кIицI лавгунни ттиния тихунмай вай масъалартту, райондалул хъунама архитекторнащалгу маслихIат ккавккун, жяматрал пикрирдугу хIисавравун лавсун щаллу буллан аьркиншиву ва лавайсса кьимат бивщунни уттинин дурсса даврин.
ЦIуссаккуллал шяравун АхI­мад-Хан Султаннул гьайкал тIитI­латIисса мажлисрайн увкIсса чIумал Сергей Меликовлул ххал бунни Виричунал цIанийсса школагу. ЦIуминалийсса ЦIу­ссаккуллал школалул гьану бивзун бур 2012 шинал. Школалий­сса цинявппагу кабинетру дузалну бур цIанасса чIумуха лавхьхьу­сса техникалул ва аьркинсса кьай-кьуйлул, спортзаллу дузалну бур спортрал кьайлул, хIаятраву бур оьрчIансса воркаут — площадка. ХIакьинусса кьини школалул кIивагу корпусраву дуклай ур 1500 оьрчI.

Андриана Аьбдуллаева,
Имара Саидова

Читайте также: