Вилла цIуллушиврул ялув инава ацIу

Коронавирус жулва оьрмулувун дурххун махъ инсантурал багьу-бизу, къуццу баххана хьунни, инсан цал ххишала марцIшиврул, цалла цIуллу-сагъшиврул ялув ацIлан ивкIунни. Вирус къалахъаншиврул, муния буруччиншиврул ккаккан був­сса ца дарув-дарман, дайгьузанну дакъар, инсан цал ялагу цалла марцIшиврул ялув ацIаву, цалла иммунитет гьаз дуллалаву ба­къасса.

Вирусрал лагма-ялттусса тIарду-ихтилатругу чан бакъар, цивппагу чIявумур чIумал щялусса, коронавирус къалиян учайминнал бигьану духIайссар ягу хIан хIачIайминнайн дурагу къалахъай­ссар тIисса, ягу лаччи ва кIяла жавж (имбирь) канарча, коронавирус къалахъайссар тIисса пурмалийсса.
Вирусрая буруччиншиврул, му, лахъарчангу, бигьану ду­хIан­шиврул щаллу булланмур уттинин жунма цимил бавсса, кIулсса бунугу, цал ххишалану тикрал буванну.


* * *
КьатIув нанийни, бюхъавай лалуххияра кахри лахъимур лаххия, чурххай тIивтIусса кIану шайссаксса чансса личIаншиврул.

* * *
Хъаннил, бюхъавай, кIиз бавтIун хъинссар, ххишаласса чIюлушиннардугу (кIисри, вичIилусру) къаларххун.

* * *
Маска канил дугьан хьхьичI марцI дурну кару шюшара, гихуннайгу чапалсса карунних мадугьларду маска.

* * *
Маскалул майгу, мурччивгу, лунттубакIгу бахьлаган бувну бикIан аьркинссар, майгу чIалай лархсса маскалия хайр бакъа­ссар.

* * *
Маска дурчала куну, рахIатну мабикIари. ДакIний битияра маскалул цийнува цила зу коронавирусрая бурукъаччинтIишиву, агарда зува, шаттирахун каругу марцI къадуллай, инсантурая метралул, метра ва дачIиннул архну къабацIлай, мугъаятну къабикIарча. Маскалул зул лагма-ялттумири зуяту азар лахъаврия буручлачисса.

* * *
Шаппайн бувкIун, маска лир­ккун махъ, мунийн щусса кару марцI дурну шюшияра. Цал лархсса маскагу чара бакъа экьидутияра.

* * *
ЦIакьсса янналия дурурхху­сса, чIяруссалийла ишла дуваймур маска духьурча, шаппайн бувкIун махъ цал кьатIатусса кару, ссахIвангу бувккун, ххуйну шюшияра, яла ликкира маска, шюшара му 60 градусраяр чан дакъасса щинай, ссахIван ягу цамур сурсат ишла бувну.

* * *
Хъамамаритари мудан зущалла ласаван цал ишла дурну экьидичайсса салфеткарду. Ми, кару марцI дуван дакъассагу, ишла дулувара чIявусса инсантурал карду щилащисса идарарттайсса нузру лакьин-тIитIин, яла най дуна экьидичаван.

* * *
Аьнч ягу хъугьу бивни, цукун­чIав гьаваллавун ягу канивун маучари, цал ишла дувайсса салфетка хьхьичIун дургьуну, ягу ссюрхъирайн, кьацI, май бавщуну учирча бакъа.

* * *
Ишла мадулларди жипливу карщи, муний чIявусса микроб­ру салкьи хъанахъиссар. Мунин кIанай ишла дувара цал ишла дайсса салфеткарду.

* * *
КьатIув бунигу, шаппайн бувкIун махъгу чапалсса кару лажиндаравун мащаванни.

* * *
Бюхъайни, арцу каруннихьхьун къаларсна, банкрал карточка ишла дурну булувара маша-ххаша. Арцу канил дургьунийгу, кару чара бакъа шюшара ягу дезинфекция дувара.

* * *
КьатIату шаппайн бучIайхту, ссайнкIуй щуннин, мугьлат бакъа кару ссахIвандалий шюшара.

* * *
Шаппайн бувкIун махъ, щинавун бучIансса хIалу дакъахьурча, тIивтIуну бивкIсса базурду (кару, лажин, ссурссу ва м.ц.) ххуйну ссахIвандалий шюшара.

* * *
Ялун ларххун диркIсса янна шюшин дичара, канихь бивкIсса сумка тIий, ттучандалия, базаллува лавсун бувкIсса кьуцуртту тIий, дезинфекциялул бувара. Мукунма ссахIван бувккун шюшара бишай яру. Спирт хIаласса хьюмушиврий марцI дувара зулла телефон, мунийгур чIявусса микробру салкьи шайсса.

* * *
Зула ичIувасса ккаччи-ччиту кьатIув бувккун бивкIхьурча, миннул бачIрал дезинфекция дувара.

* * *
Чара бакъашиву дакъа, мабуккару кьатIув, мазанарду чIявусса инсантал бавтIсса кIанттурдайн.

* * *
Маска мудан ларххун мазанарди, му ишла дувара чIявусса инсантал бавтIсса кIанттурдай, ва му 2 ссятрай цал даххана даван хъамамабитари.

* * *
Зура ишла дуллалимунил (телефон, ноутбук, компьютер) дезинфекция дулувара чIун-чIумуй.

* * *
Бюхъавай хъямала багьавуртту, карду дугьавуртту дакъа щаллу хьунмур булувара, архнияра гьим дурну, ка кIутIу дурну.

* * *
Къалиян тIутIиминнайн коронавирус лахъаврил нигь хъиннура хъуннассар, цанчирча миннал каруннил кIисри шаттирахун мурччайн щилай тIий, къалияндалул гьутрурдал гужгу хьхьара бувайну тIий.

* * *
Цуксса мюнпатсса дунугу дукиялул, дукралухун ишла дуллалимунил инсан коронавирусрая хъин къаувайссар, амма цIуллу-цIакьсса иммун системалун, азарданущал таланшиврул, дакъа чара бакъассар витаминналгу лащу-щаллусса, чурххангу бузсса дуки-хIачIия.

ХIадур бувссар
Бадрижамал Аьлиевал

Читайте также: