Ванал гьалмахтал инсаншивугу, интеллигентшивугур

Кулпатращал

[dropcap]М[/dropcap]иллатрал язисса арс Артур Исрапиловлущал цалчин кIул хьу­ссара му ЦIуссалакрал райондалул хъунаманал хъиривчуну зузисса ппурттуву. Нагу, Тамара Закаръяевагу, нюжмар ляхну тIиссакссагу ЦIуссалаккуйн лагайссияв материаллу датIин, гихсса инсантуращал хьунабакьин.
Район ца чулуха Чачаннал дазуцIухсса душивруцIун дархIусса захIматшивуртту дусса, гамур чулухагу ЦIуминалийн дизан дуллай сукку хьусса аварасса чIун дия, гихсса тагьардания чIун- чIумуй буккултрахь бусан багьлай бия агьалинащал хьунабавкьуну. Жу цалва кабинетравун бу­ххайхтува, Артур Анваровичлул, зу ххуллийх ккашил хьуссару, цал ахттайнсса дукан жуннийн гьантIиссару, яла зулла материаллалсса булланссару увкунни.

Ламуснугу бунува, бачин багьуна. Жу бучIаннин хIадуршинна дурну дия Артурдул кулпатрал Заирал. ТIайламур бусан, крабирттал салат тани ттун цириврагу къакIула, цалчин тайннал ужагърайри дуркусса. ГацIана бувчIуна дакI тIиртIусса Заира кару магьирсса хозяйкагу бушиву.
Тани утти кунна транспорт гьарзанугу къадикIайва, ЦIуссалаккуйн лага-бучIан бигьану бакъая. Кувний, шяраваллавух буклай бунува, маршруткалийн чIал шайвав. Артур Исрапиловлул ва иширавугу кумаг бувайва, жу Хасаврайн биян буван машина тIайла буккайва. Шиккува барчаллагьрай кIицI лаган ччива, укуннасса къулагъас мудангу жухра дувай­сса диркIсса Муслим Даххаевлул ва Арсен Каммаевлул, (аьпа бивул), цIардугу. Хъамакъабитанссар кIилчинмур ишгу: Артур Исрапилов МахIачкъалаллал Кировский райондалул администрациялул хъунаману усса ппурттуву­сса ттунма хьусса тIайлабацIугу.

Муданмасса буруккин – подписка мунил цIанийгу чIявуну занан багьайва. Лавгра Артур АнваровичлучIан. Гъарал зиг буллуну ларчIсса, дяркъусса кьини дия. Атилгу хьуну бувкIсса ттуй цIими хьухьунссия, ганал увкунни : «Ина подписка дуллай къазананшиврул вин циксса кказитру чичин аьркинни уттигу?». На бусав ца зувива кказит ттигу чичин буван багьлай бушиву. Цумурдив ца отделданул хъунмур бучIан бувну, тапшур бунни ганийн, райадминистрациялий зузисса циняв лак кказитру чичин бува куну. Дурккун, 20 азарда къуруш ттухьхьуннагу дуллунни, пенсионертуран, мушакъатминнан подписка дувара куну.
Редакциялий ттулва тIайлабацIу хьу­сса аьрххилия бусайхту, ттухь коллегахъул хъярчирай, 50, 100 кказит чичинсса план дур циван къаучав тIун бивкIунни, Артур Анварович миксса чичин кумаг бувангу махъаллил къахьун­сса кIулну.
Цаппара шиннардил хьхьичIгу, цIусса шиндайдихьулул гьантрай , Артур Исрапиловлул тIайла увккун мунал водитель увкIуна вара подпискалул кумагран кьуазарда къурушгу, коллективран шампанскийлул ящикгу биян буван.

Цалгу, кIийлгу къабувссар жу Артур Анваровичлущал кказитрайн ихтилатгу. Мунал эрудициялул бияла кIулну, мудангу интервьюрайн ххуйну хIадур хьун­сса хIарачат бувайссия. Ларсъссия интервьюрду Артур Анварович республикалул хIукуматрал жаваблушинна дусса къуллугъир­ттай зузисса чIумалгу. Хъинну дакIний ливчIуна му Бущихъиял райондалийсса ва ЦIуссалаккуйсса дяъвирдал цIарава увкIсса чIумал бувми ихтилатру. Мачча-гъанми, архIал зузими 30 инсан лагма лаган бувну: «На талан най акъара, укуна ялтту укканна нанисса»,-тIий, ичIувациригу «хъяврин бувну», лавгун ивкIссар му га яла нигьачIаву думур кIанайн. Ялая ва паракьатну , амма пахрулий буслантIиссагу, цаягу цащала увкIсса инсаннал дакI дякъин дуван­сса тIул къадунни, вирттал кунма къуццу тIий бивкIунни дяъви къизгъинний тIий.

Чара бакъа чIурчIав дуванна Артурдул буттал шяраваллил 1-мур ЦIувкIуллал цIа-кьини бюхттул дувавривугу биялсса бутIа бивхьушиву. Ванал хIарачатрайнуя ЦIувкIрав, чIявусса бусравсса хъамалгу бавтIун лахъсса даражалий пагьламантурал фестиваллу дурссагу. Ванал хIурматранъя тани­сса республикалул президент МахIаммадссалам МахIаммадов ЦIувкIрав увкIссагу.Таниннин Дагъусттаннал хъунама ЦIувкIрав ивсса тарих бушиву къакIулли. МахIаммадссалам МахIаммадовлул 2011 шинал Аьра­сатнал ХIукуматрал цанна дуллусса премиягума ЦIувкIуллал пагьламанту­рал школалун дуллуссия. ЦIу­ссалаккуй увну ва хъуна хьуну ухьурчагу, Артурдул ЦIув­кIу­ллал шяраваллингу, жяматрангу чIявусса хъинбалар­тту був­ссар. Мудангу ЦIувкIуллал жяматрал иширттачIа цалчинминнавух уссар. ЧIявусса масъа­лартту ванайн бувккун щаллу байссар. Ярославрай Совет Союзрал кIийла Виричу АхIмад- Хан Султаннун гьайкал дацIан дуллалисса чIумалгу ва чялишну хIала увхссия му давривух. Вава Ярославрай губернаторначIасса хьунабакьаврийн нанисса ппур­ттуву, Ярославрал областьрай­сса дагъусттаннал диаспоралул хъунаманал губернаторначIан телевидениялиясса журналистътал буххарча гьассар учайхту, Артурдул нагу, Имара Саидовагу хьхьичIунмай бувну, хьхьичIва- хьхьичI миллатрал пресса буххантIиссар увкуна. ХьхьичI бавкьуну буххангу бувнав.

Мариян Илиясовал гьаттай гьайкал тIитIла­тIисса ппурттуву, Читтурав бакIъялавайсса ххуллийх наниний, иттисса аьрщарайх ша личлай нанисса ттучIан кIия жагьил гъан хьуну, кумаг буллай бур. КIикку щиллив, тай жагьилтурал мяърипат душиву, цалагу ххуйшиву учайхту, цуманаллив: «Жагьилтал Артур Исрапиловлул арсрур»,-куна.
«Артур кунасса буттал укун­сса бакъа арсругу бикIан къабюхъайссия», — ку­ссия нагу.

ПатIимат Рамазанова