[dropcap]С[/dropcap]ентябрьданул 19-нний Каспийскалий хьунни строительствалул аралуву зунсса пишакартал хIадур баврил ва ми давур­ттал дузал баврил масъаларттан хасъсса пилотрал проект ххал дигьлагьисса батIаву. Муний гьуртту хьунни ДР-лул ХIукуматрал Председательнал хъиривчу – дуккаврил ва элмулул министр Уммупазил Оьмарова, ДР-лул экономикалул ва территориярттал лябуккулул министр ХIажи Султанов, ДР-лул захIматрал ва социал иширттал министр Изумруд МухIуттинова, ДР-лул Минстройрал вакилтал ва цаймигу.

Республикалул захIматрал рынокрай строительствалул пишакартал биялну бакъашиву хIисавравун лавсун, ДР-лул Минэкономразвитиялул хIукму хьуну бур строительствалул колледжирттал студентътал буцин къатри дуллалисса кIанттурдай практикалий зун, яла, дуккаву къуртал хьувкун, тиккува зунсса шартIирай. Му пикрилуцIун авкьунни «СтройСитиХолдинг» ООО-лул гендиректор АьбдулвахIид Жаватовгу.
Делегация бувкIунни Каспийскаллал ца къатри дуллалисса кIанайн. Даву канилух дурксса усттартурал студентътуран ккаккан бунни мастер-класс, бувсунни даву дачин даврил захIматшивурттая.

Яла хьунни строительствалул пишакартуран давуртту дузал даврил масъалартту ххал бигьлагьисса батIаву.
Уммупазил Оьмаровал тIи­мунийну, цIанасса ппурттуву республикалий чIярусса къатри дуллай бур, мунияту аьркинну бур му аралунсса пишакартал хIадур буллан. Мукунма аьркинну бур практикалий зузисса чIумал студентътуран харж бишаврил ма­съалагу дузал буван.
Пилотрал проектрацIун каба­кьин рязи хьунни Изумруд МухIуттиновагу. Мунил тIимунийну, бюхъантIий бур зузисса студентътуран дулун стимулированиялунсса арцу (выплатартту).
БатIаврий махъру лавхъунни цайминналгу. Масъала ххал бивгьуну махъ хIукму хьунни цачIу хIадур дуван проект бартдигьаврил мухIлу-хIин, ва батIаврий хьу­сса циняв ихтилатчитурал мурадру ва пикри-зикрирдугу хIисавравун лавсун.