Совет Союзрал Виричу ХIажи Бугъановлул цIанийсса Султанянгиюртуллал (Хъанардал) 2-мур школалул дуклаки оьрчIал ва учительтурал хьхьичIуннайшивурттая бусласисса макьалартту жул кказитрал лажиндарай ччя-ччяни дуккайссар.
Къизилюртуллал райондалул администрациялул бакIчи Шабанов МахIаммадлул Цасса ПаччахIлугърал экзаменнай ларайсса ккаккияртту хьун даврихлусса барчаллагьрал чагъар буллунни ва школалий 25 шинал мутталий оьрус мазрал дарс дихьлахьисса, Карашрал шяраватусса Шагьимарданнул душ Оьмарова Индиран.
Имара Саидова
Буниялагу, учительнал даврин бишлашисса яла бюхттулмур кьимат, оьрчIан куртIсса кIулшивуртту дулаву хъанай бур. Индирал му цимилгу тастикь бунни. Гьашинугу, ванил каялувшиву дуллалисса 9-мур классрал выпускниктурал арулуннал къуртал бунни школа мусил медальданущал ва ряхра мусил медаль ларсунни 11-мур класс къуртал бувсса ванил оьрус мазрал дарс дихьлай бивкIсса выпускниктурал.
Индирал дарс дирхьусса оьрчIру, оьрус мазрал ва литературалул ЕГЭ-дай ва ОГЭ-дай яла лавайми баллугу лавсун, республикалул ва Аьрасатнал хьхьичIунсса вузирдавун дуклан бувххунни.
Ванил уттинингу, дуклаки оьрчIащал республикалул даражалийсса олимпиадарттай ва конкурсирттай гьуртту хьуну, цимилгу бувгьуссар хьхьичIунсса кIанттурду.
Му бакъассагу, Индира каялувшиву дуллай бур школалий тIивтIусса ХIажи Бугъановлул цIанийсса тарихрал музейрайгу. Ва музей ккаллину бур ца яла хьхьичIунмурну.
Бусравну бур Индира архIал зузиминнал, дуклаки оьрчIал ва миннал нитти-буттал дянивгу. Цила захIматрансса яла лаваймур кьиматнугу, Индирал мудангу ккалли дай оьрчIал ккаккияртту.
