«Гъумучиял базар щинчIав къабавххуссар!»

«Гъумучиял базар щинчIав къабавххуссар!»

Лакрал райондалул бакIчи Юсуп МахIаммадовлул агьалинайнсса лаизаву

Соцсетирдай лагь хъанай бакъар цамур кIанттайн бизан бувсса Гъумучиял базарданул хIакъиравусса аваза, хIатта мунил ялув Юсуп МахIаммадовлул цимилагу бувчIин бавуртту дурнугу дунура.
Райондалул бакIчи цIунилгу лаизлай ур агьалинайн.

— ХIурмат бусса Лакрал райондалул агьалий!
Райондалул активистал цимилагу бувккунни ттуйн Гъумучиял базар цамур кIан­ттайн бизан бан тавакъю буллай, мунин­сса хIуччану базар хIакьинусса кьинилун къалавхьхьуну къумасса бушиву хьхьичIун ласлай.

КIанттул ссуссукьушиву сававну, ишбажаранчитуран багьлай бия дахлахимур базаллул кьатIувсса кIичIирацIух, бяр­нил ккурккал чIарах дихьлан. Мунийну бярнил лагмасса кIанттурдугу чапал хъанай бия, транспортрангу захIматшиву хъанай дия, ризкьи бахлангу къулайну бакъая.
Инсантал шикаятрай бия базаркьинилия махъ ччюрк, чапалшиву личIлай душиврия. Гъумучиял школалул учительтал ва нину-ппу шикаятрай бия дуккаврил идаралучIансса ххуллу дахлахисса кьайлул бувгьуну бушиврия. Му бакъассагу, райондалул администрациялийн букIлай бия санэпидстанциялиясса чагъарду, кIичIираву дукия даххаврил шартIру са­ни­тар-эпидемиологиялул тIа­лавшиннардацIун дакьлакьисса дакъашиврийн бувсса.

МуницIун бавхIуну, Гъумучиял бярнил лагма-ялттусса кIантту бакьин буллалисса ппурттуву, шяраваллил администрациялул бакIчинахгу вичIи дирхьуну, жу хIукму бувссия базар хьхьичIарасса колхозрал хIаятравун бизан бан. Гьарза-гьартасса кIану, дукия хозяйствалул кьай-кьуйлия, ризкьилия личIину дахлан къулайшиву ххишала дусса кIанттайн. Строительный материал дахлахисса кIанугу бярничIасса кьуллалучIату бизан бувссар пекарнялул хьулучIан, мунийну шяраваллил вивсса ххуллугу бачIва хьуссар. Гьай-гьай, базар бивхьусса кIанугу, ми­ккун нанисса ххуллугу бакьин бан багьлай бур. Аьркинну бур, магъигу ларкьуну, ларекру, витринарду дурну, дахху-ласулун къулайсса шартIру дузал дан. Дур, хьхьичIвамур базаллувугу диркIсса диялдакъашивуртту, амма кIикку дур цинна лар­хьхьусса къулайшивуртту.

Гьарцаннан баяншиврул цал ттигу тикрал буллай ура: хьхьичIвасса базар щинчIав къабавххуссар! Базар цамур кIанттайн бизан бувсса бухмур базаллул кIану баххансса мурадрай бакъар. КIиккусса цаппара кIанттурду бавххусса «зеленкарду» на райондалул бакIчину учIаннин буллуну бия. Му ба­къассагу, базар бизан баврил ялув агьалинаясса рязи ба­къашивуртту кIулну, на тапшур бувссия, агьалинащал хьунабавкьуну, миннал пикрирдах вичIи дишин. ДатIлай бу­ссия базар бивкIсса кIанттайн бизан бан ччисса инсантурал къулбасру. Амма ца пикрилийн ттигу бучIан бувару. Ци чулийгу, на ттигу рязину ура базар бизан баврил хIакъираву агьалинах вичIи дишин. Жу рязину буру базар цуппа бивкIсса кIанттайн бизан бан, агарда агьалинан мукун къулайну бухьурча.

ХIурматращал
Юсуп МахIаммадов

Читайте также: