Дагъусттаннал БакIчи Владимир Васильев гьуртту хьунни АьФ-лул Президент Владимир Путиннул видеоконференциялул низамрай
дурсса санитар-эпидемиологиялул тагьарданул ва цIуллушиву дуруччаврил система кIинтнил чIумуйн хIадур шаврил хIакъиравусса батIаврий.
Владимир Путиннул тIимунийну, махъсса циняв зурдардий цIуллушиву дуруччаврил масъаларттах къулагъас хъуннану дуллай бур. Эпидемиялул чIумал медициналул кумаграл системалул давуртту лавайсса даражалул сакиншиндарай дурунни. Гьай-гьай, дия захIматшивурттугу, диялдакъашивурттугу. Му мукуннугу, бювхъунни эпидемиялул гьужум хIурхIалаган буван.
Амма паракьат хьун къабучIиссар. Тагьар уттигу захIматсса дур. Укунсса тагьарданий аьркинссар цIуллушиву дуруччаврил системалуцIун кабакьлан, мунил бюхъу лавай буллан. ХIадурну бикIан аьркинни кIинттул дяркъу дурккукун ОРЗ, аьнч-кинч ва цаймигу азардаща буруччин. Экспертътурал тIимунийну, бюхъайссар коронавирусрал инфекция цIунилгу дайдишин.
Яла ихтилат бунни Аьрасатнал вице-премьер Татьяна Голиковал.
Билаятрай коронавирусрал инфекциялуцIун дархIусса тагьар, мунил тIимунийну чан-чанну тIий хъин чулиннай кIура даллай дур. Ковид-19 азарданул къашавайсса ялу-ялун чан хъанай бур. Мунил литIлатIими 2,5 процентраяр чансса бур, ми цаппара цайми билаятирттайминнаяр чанссаннун ккаллину бур.
