[dropcap]Ч[/dropcap]Iун-чIумуй, «Илчи» кказитрай бувсун бикIай, жула лакрал чичултрал, шаэртурал, аьлимтурал, журналистурал ва цаймигу пагьму-гьунарданул заллухъруннал итабавкьусса луттирдая.
Къащишиву ци дикIай учирча, ми канил бугьан къабюхълахъаву дикIай. На кунмасса, луттирду ккалан ххирасса, ми салкьи буллан ччисса инсантурайн, библиофилтал учайссар. На цIуххаву къадав, амма умуд бур, луттирду ккалан ччисса, ми салкьи буллан ччисса инсантал Ккуллал райондалий чансса бакъашиврий.
[dropcap]Ч[/dropcap]Iярусса шинну ларгунни луттирду баххайсса ттучанну бакъашиврия буслай, луттирду баххай идара «хъюртул щинайн» бувкшиврий аьтIий. Акъассаривкьай жула цучIав лакку мазрайсса луттирду баххайсса ттучан Ккуллал райондалий тIитIинсса?
Щаллусса ттучан къахьурчагума, хьунссархха ттучандалуву луттирдансса ца мурцIу хIасул буван. Луттирдал чIарав дишинссар цаймигу чичрурдал ва чагъардал кьай-кьуй. Масалдаран, Ваччав бур чIявусса, бачIвасса, райпорал ттучанну бивкIсса, ххуйну яхьусса къатригума.
Укунсса иширал на мудан махIаттал уллан икIара. Дагъусттаннал Огни тIисса шагьрулий бур «Дагъусттан» цIанилусса, циркрал искусствалул школа. Та школа 50 шинал хьхьичI хIасул бувну бур Камил Кьурбанов тIисса гьунарду ккаккан бувул. Ганиннин цукунчIавсса циркрачIан гъансса ишру бувагу къабивкIсса шагьру, му инсаннал кIура баен бувунни циркачтурал шагьрулийн. Шиккува ххибан ччива ца укунсса затгу.
Ккуллал райондалий мукьра шяраву — Хъусрахь, Ккулув, ЧIяв, Вихьлив, бикIайссар нюжмардул мутталий мукьра кьини дахху-ласулул ярмукIа. Бюхъанссияхха шиккун лавсун букIлан луттирду ва цаймигу канцеляр зумунусса кьай-кьуй. Лакралми чичултралминнущал архIал хьунссархха цайми оьрус мазрайсса луттирдугу бахлан.
Ва ххаллилсса Лакку билаятрал тIабиаьтрах ялугьлай, ванил хIайран уллалаврицIун, ччай бурхха яруннин чIалачIимунищал бакIравун ласлан гьунар бусса, пасихIсса мазрал ва асардал аьламатругу. Цайми къакIулли, навама хъинну «мякьну» икIара жула «Илчилий» пулансса луттирду дунияллийн бувккунни тIий, ккалай, амма канихьхьун къабириллай.
