Август зурул 1-нний Дагъусттаннай дистанциялул режимрай байбивхьунни Worldskills Russia «Жагьилсса пишкартал» тIисса Миллатирттал VIII-мур чемпионатрал финалданий гьуртту хьунтIисса пишакартал язи бугьлагьисса бяст-ччаллу. Августрал 20-ннийн бияннин бик1ант1иссар вай бяст-ччаллу.
Имара Саидова
[dropcap]Ш[/dropcap]иккува кIицI лаган, гьашину цалчинни ва чемпионат манзилданул режимрай хъанахъисса.
Финалданул бяст-ччаллу байбишинтIиссар сентябрь зурул 6-нний, ялув кIицI лавгсса куццуй, манзилданул режимрай. Цалчинсса кьинисса бяст-ччаллу байбивхьунни Каспийск шагьрулийсса Республикалул кIулшивуртту дулаврил центрданий ва Хасавюртливсса Услугардал сферардал колледжраву, цIигьуршиврул магьиршиву ккаккан давриву.
Вара кьини «Веб-дизайндалул» ва «Электромонтажрал» пишардал магьиршиву ккаккан дуллалисса бяст-ччаллу байбивхьунни Р.Н. Аьшураьлиевлул цIанийсса Республикалул технический колледжравугу. Бяст-ччаллал даву цукун най дурив ххал дан Технический колледжравун увкIунни ДР-лул ХIукуматрал Председательнал хъиривчу, энергетикалул министр Владимир Лемешко, «Успех» центрданул директор Тамерлан Бугъанов ва Технический колледжрал директор Мафият Рахманова.
Тамерлан Бугъановлул балжину бувчIин бунни «Веб-дизайндалул» ва «Электромонтажрал» пишардал технический заданияртту биттур даврил процессрая.
Владимир Лемешкол тIайлабацIу чIа увкунни гьуртту хъанахъиминнан ва кIицI лавгунни цува колледжрал гихуннайсса давривух мудан хIала-гьурттуну икIантIишиву.
Гьашинусса чемпионатрал финалданий гьуртту хьунтIисса пишакартал язи бугьантIиссар 16 журалул пишардал усттаршиву ккаккан давриву.
Чемпионатрал агьамми мурадругу бур жагьилтурал дянив захIматрал пишарду машгьур баву ва миннал даврил даража гьаз баву.
Ххув хьусса пишакартал гьуртту хьунтIиссар Worldskills Russia Миллатирттал VIII-мур чемпионатрал бяст-ччаллаву.
ДакIнийн бутан, республикалий ялу-ялун машгьур хъанахъисса захIматрал пишардал чемпионатрал сакиншинначитал хъанахъиссар ДР-лул ЗахIматрал ва социал хьхьичIуннайшиврул, КIулшиву дулаврил ва элмулул министерствартту ва чIарав бацIаву дурссар Дагъусттаннал ХIукуматрал.
