[dropcap]И[/dropcap]юльданул 28-нний ДР-лул БакIчи Владимир Васильевлул ва жула республикалийн къуллугърал аьрххилий увкIсса АьФ-лулэкономикалул лябуккулул министрнал 1-ма хъиривчу Михаил Бабичлул дурсса батIаврий ххал бивгьунни республикалул социал-экономикалул лябуккулул масъалартту.
Владимир Васильевлул барчаллагь кунни федерал ведомствалул вакилтурахь, цаппара шиннардил мутталий Аьрасатнал Минэкономразвитиялул региондалун кумаг буллалаврихлу.
Михаил Бабичлул бувсунни делегациялул вакилтурал ният душиву цаппара дуллалисса объектру ххал дуван ва кIул хьун республикалийсса захIматсса масъаларттащал. Мунал тIимунийну, мукунсса масъаларттуну хъанай бур жяматру ххуй-хъинсса щинал дузал баву, щин марцI дуккан дувайсса сооруженияртту дуваву ва цаймигу.
ДР-лул ХIукуматрал Председатель Артем Здуновлул гьартану бувсунни республикалул лябуккулул хIасиллая.
Республикалул премьер-министрнал кIицI бунни мукунма уттинин дузрайн буккан буван къавхьусса, чIярусса арцу харж дуван аьркинсса масъаларттугу. Мунал Михаил Бабичлухь тавакъю бунни, щинал дузал баврил ва ишла дурсса щин дукьан даврил объектру дувансса арцу дучIан даврин кумаг буван.
Артем Здуновлул тавакъю бунни мукунма кугьна хьусса, лекьлакьисса школартту гьануцIакул бакьин буван ва ясли-садру буван кумаг баву.
БатIаврий ихтилатру бунни мукунма ДР-лул шяраваллил хозяйствалул ва бакIлахъиялул министр Абзагьир ХIусайновлул ва ДР-лул туризмалул ва халкьуннал касмурдал министр Расул Ибрагьимовлул.
