Августрал 12-нний ДР-лул Премьер-министр Артем Здуновлул каялувшиврий хьунни ДР-лул ХIукуматрал ва коронавирусрайн къарши буккаврил Оператив штабрал цачIусса батIаву.

Дагъусттаннайсса коронавирусрал эпидемиялул тагьардания ва мунийн къаршину дуллали­сса давурттая бувсунни ДР-лул Роспотребнадзорданул каялувчи Николай Павловлул. Мунал тIимунийну, махъсса 4 нюжмардий республикалий азарданул къашавай шаврил бущи (темп прироста) 0,5% бавцIуну бусса бур, мунияр ялавайгу багьлай бакъасса бур. Мунил савав дусса дур халкь маскарду дакъа занай бушиву, къадагъа дуна, чIявусса инсантал салкьи хьусса давуртту дуллай бушиву, банкетирттал заллу тIитIаву ва мукунма Да­гъусттаннал инсантал кьатIату зана шаву. Мунийн бувну, Николай Павловлул шагьрурдал ва районнал бакIчитуран дакIнин бувтунни маскардал низам ттиния тихуннайгу дуручлан аьркиншиву ва мунил ялув бацIаву дуллан багьлай бушиву.

Ссуссукьушивуртту дукьан даврил 3-мур ятIапрайн бучIав­рил хIакъираву буслай, Николай Поповлул кIицI бунни цIанасса эпидем тагьар хIисавравун ларсун, 3-мур ятIапрайн бучIан бюхълай бакъашиву сентябрьданул 1-ннийнин.

Докладрая махъ Артем Здуновлул бувсунни оьрчI-бакI школарттайн занан бивкIукун хъунмур къулагъас дикIан аьркиншиву профилактикалул ишир­ттах ва миннул ялув бацIаврих. Мунияр ххишалагу, увкунни мунал, къулагъас хъун дуван аьркинну дур республикалийн букIлакIисса туристътурах ва ми бацIайсса, дукра дукайсса кIанттурдах.
Яла ихтилат бунни мува масъалалул хIакъираву ДР-лул цIуллушиву дуруччаврил министр Жамалуттин ХIа­жиибрагьимовлул.