[dropcap]Б[/dropcap]уссарив лакку мазраву гъалгъалул чIу [хI] (мунийн учай [гья]) аьркинссарив х1арп ХI?
Гьарца мазрал дикIайссар циннасса чичрулул кьяйда.
Лакку мазралмур кьяйдану хъанахъиссар фонетикалул кьяйда, яни гьарца махъ чичайссар увкусса, бувккусса журалий. Учаву, буккаву даххана хьувкун, чичавугу даххана шайссар.
[dropcap]Л[/dropcap]акку мазравун буква ХI бутаврил му кьяйда лиян дуллай дур, чичаву ва буккаву захIмат хъанай дур, гъалатIру чIяву хъанай бур. Цукунни буккин аьркинсса укун чивчусса махъру: хIакин, хIукму, хIисав. Вай мукъурттил чIурду бур укунсса: гьякин, гьюкму, гьесав. ЧIурдан [аь], [оь], [э] кIанай чичлай буру [а], [у], [и].
Лакку мазраву кIай кьакьарттул чIурду чичайссар я, ю, е хIарпирдайну. Х1арп ХI лакку мазрава дукьан багьлай бур. Ва хIарп дукьан дарчан, гъалатIругу чан хъанай бур, буккаву ва чичавугу кIанийн дагьлай дур. Аьркинссарив я, ю, е-лун кIанай а, у чичлан? Ххал бара укунсса махъру цанния ца цукунсса чIунил личIий буллай бурив: гьяллу-гьаллу, гьюкIу- гьукIу, бугьан-бюгьан, гьан-гьян. Дуклаки оьрчIал мукунсса махъру чивчусса куццуй буклай бур: хIакин [гьякин], хIукму [гьукму], гьисав [гьесав].
[dropcap]Ф[/dropcap]онетикалул тIалавшиндарайн бувну укун буккингу багьлай бур. Ххал бара, цукун буккинтIиссар укунсса махъру: далухIи, бурхIлу, бахIаву. Жува оьрчIан чичин-буккин лахьхьин буллай буру звуковой аналитико-синтетический кьяйдалийн бувну. Цалчинсса слог буккиннин махъва-махъмур слограх буруган багьлай бур. Гьарца буквалул чIу ккаккан буллай бур. Бур чIурду 2-4 хIарпирал ккаккан буллалиссагу. Миннул чIарав тIиртIу хIарп дирхьувкун, слог сакин хъанай бур. Мукун чичлан ва ккалан лахьхьин бан къашайссар.
[dropcap]Б[/dropcap]уссар лакку мазраву цаппара махъру увкусса куццуй чичин къашайссагу. Ми чичин къашайссар увкусса куццуй, мивусса гъалгъалул чIу ккаккан хIарп дакъа тIий. Бакъар лакку мазраву лабиализованный чIу. Лабиализованный чIу ккаккан бан бюхъайссар ларкьу хIарпирачIа в бивхьуну, масала: цIу лерщунни, дукралийн цIву бича, цва бувкIри шиккун, ца инсан увкIунни, хъа-хъва, чIанкъатлуву оьрчIи хъа дия, на хъва буллай ура щялмахъ къабусан, зун бачияра, звун ци кIулли, ччан-ччван, ччан чIивисса бур, оьрчIан душ ччван хьуна. Мукунмасса махъру буссар чут бакъассагу: ккваччи, ква, ххва, ххвал ку. Укунсса мукъурттил мяъна дурчIин дайссар вайннуцIун бавхIусса цайми мукъурттил, масала: ва кIвану цуманалли, барзул хъа, хъва буван аьркинссар.
ХьхьичIава жула учебникирттай чичайссия лабиализованный хIарп в дирхьуну. Дуклаки оьрчIал ми махъру фонетический журалий ккалай тIий, мукунсса чичаву дукьан дурссия. Ккаччи тIисса махъ ккалан бикIайва ккваччи тIий.
Оьрус мазраву чичаврил кьяйда личIиссар – морфологиялийнуссар: единообразное написание всех морфем (приставка, корень, суффикс, окончание) независимо от их произношения. Масала: приставка с- списать, [с] cписать, cделать [з] сделать, мархха, мясо[ м’а.са], орфографический мясной[м’исной].
Оьрус мазравугу дуссар цаппара морфемарду фонетикалул журалий чичайссагу, масала: приставка рос чичайссар мукьва журалий, дурккусса куццуй: роспись, расписаться, разделить, розданы. Оьрус мазраву цаймигу буссар морфологиялул журалий къачичлачисса махъру ва махъру сакиншаву: традиционные, исторические, дифференцирующие.
ЦIуну чичру сакин хьусса чIумал, 1000-1500 шинал хьхьичI, оьрус мазрал кьяйдагу диркIссар фонетикалийнусса. ЧIун наниссаксса маз баххана хъанан бикIайссар, чичаврил журардугу баххана байссар хIукуматрал указрайн бувну. Лакку мазравумур кьяйдагу 4 даххана хьун бюхъайссар, шинну ларгукун, 500-1000 шин. Жунма лакку мазраву чичлан аьркинссар фонетикалул кьяйдалийн бувну.
Жу ва масъала лакку мазрал учительтуращал ххал бивгьуссия. Циняв лакку мазрал учительтал хъинну рязину бия буква ХI букьан баврий. Мунин кIанай ишла буллан аьркинссар буква Гь. Гь-лул хъирив ягу мунил хьхьичI у,и-лун кIанай чичлан аьркинссар я, ю, е. Миннул ккаккан буллалиссар кьакьарттул тIивтIу чIурду [аь], [оь], [э]. ОьрчIащалгу барду жу мукунмасса ихтилат. Гайннан ххуйну бувчIлай бия ХI аьркинну бакъашиву. Амма мукьа оьрчIал ХI битан аьркинссар куна. Гайннавасса цаннал куна: « Оьрус мазравугуния бувккусса куццуй къачичару, масала; дом, домой[дамой]». Жу гайннан бувчIин барду оьрус мазраву чичру морфологиялул зумунусса душиву.
[dropcap]О[/dropcap]ьрчIан цукун лавхьхьуну бурив ххал бан, 5-8-чинми классирттаву диктант дурссия вай мукъурттия: хIалу, хIилла, хIукму, далухIи, бурхIлу, мухIлу, бухIан, махIатталну, бахIаву, хIисав. Гьарца классраву чивчуссар 100 махъ, 10 оьрчIал 10 махъ. Вана хIарп ХI а, у бивхьуну чивчусса мукъурттил ккал:
5-мур класс — 12 махъ
6 -мур класс — 17 махъ
7-мур класс — 26 махъ
8-мур класс — 26 махъ
Жямну ХI, а, у бивхьуну чивчусса махъру — 81(20%).
Гь я, ю, е бивхьуну чичлай бур 80%.
Х1арп ХI-лул хIакъираву чичирча хъина зувагу зула пикрирду.
Гьарун Буржунов,
филологиялул элмурдал
доктор
