[dropcap]Л[/dropcap]акку маз яшаврия, мунил бакIрачIан бучIантIимуния буслай, чичлай, дискуссияртту дуллайнма буру жува. Му ахттар бавриха муданмагу зий бур «Илчи» кказитрал редакция ва мунил ххаллилсса коллектив. ХIайп, аьпалухьхьун лавгунни микку зий бивкIсса, мунил вирдакIну ккалли бувансса Рамазанов Рамазан («Илчи-Разу), КIурухов ХIасан, Аьбдуллаева Загьрани. Цал аьпа баннав, гьаврду нурданул дуцIиннав. Мукунма лакку мазраха зий бур «ЦIубарз» журнал, лакрал шаннагу райондалул кказитру, ДГПУ-лул ва ДГУ-лул лакку мазрал отделениялул зузалт. Цан хъунмасса барчаллагь. Зий бур муданма лакрал чичулт, шаэртал, театрданул зузалт.
Шиная шинайн чан хъанай бур, бумигу оьрмурдал бугьара хьуну бур, лакрал чичулт, шаэртал. Ялун биллай бакъар жагьилсса, гьунар бусса цайми.
Ци тIий, ци ххал бигьавуртту дулларчагу, ниттил мазру лахьлахьаврил масъала ялу-ялун захIматшиврухун багьлай бур. Школарттай чанну дур ниттил мазрал дарсру.
Жула вузирдавугу ниттил мазрал отделениярттай ккалаккимигу чанну бур тIар. Школа къуртал бувма, нажагьсса акъа, мивун ккалан най акъар. Дурккуну личIи ци банссар, щаллусса 18 ссятрал ставка школалий бакъани.
[dropcap]С[/dropcap]овет заманнай Ккуллал райондалул 14 шяраву 19 школа буссия, биялсса оьрчIругу бусса, муаьллимталгу зузисса. На Ккуллал райкомрал инструкторну зузисса чIумал, 1976-ку шинал, Ккулув ккалай буссия 1700-нния ливчусса оьрчIру, Хъусрахь буссия 900-нния ливчусса, Вихьлив буссия 700-нния ливчусса. ЧIирисса СумбатIуллал шяраву 126 оьрчI уссия школалий ккалай. Мукунма цайми щархъавугу бия биялсса. ЦIана тIурча, 14 школалий ур тIар 750 дуклаки оьрчI. Гьашину ЕГЭ дуллай увагу 24 выпускник ия. Райондалул хъуними, кIулшиву дулаврил управление гьаксса аякьа дуллай бур дуккаврих, амма агьали бивзун лаглай бур шагьрурдайнмай.
[dropcap]Н[/dropcap]а хъунмасса тавакъю бавияв «Илчи» кказитрал зузалтрахь ва корреспондентурахь, кказитрай шяраваллил хозяйствалиясса макьалартту ришлашира увкуну. Жула лакрал районнай бакъар агьали зунсса кIанттурду. Совет хIукуматрал заманнай Гъумук, Ккулув, 2-мур ЦIувкIрав (Гьамияхь) зий буссия, биялсса зузалтгу бусса, нагь, нис дай заводру. Колхозру зия хьурчагу, Ккулув, Хъусрахь, 1-мур ЦIувкIрав, Ваччав, Хъювхъав, ризкьигу ябуллай, зий бур СПК-ду. Циняв щархъаву дур ЛПХ (личное подсобное хозяйство), КФХ-ду (крестьянско-фермерское хозяйство), агрофирмарду ва м.ц. шяраваллил хозяйствалуха зузисса кIанттурду. КIайннуятугу ччя-ччяни «Илчилий» чичаван аьркинни. Бабаюртуллал, Бакресс-Бажиганнал зонардай зузиминнал ци багьу-бизу буссаривгу буслан аьркинни, миннун хIукуматрал чулуха ци кабакьу буссаривгу ккаккан бувну.
Жул СумбатIуллалгу бур печать ва штамп бакъа бакъасса СПК, Гъази Оьмаровлул цIанийсса. Аьрщарал кьутI гъайчинсса трактор дакъар, щархъахь миннат буллан багьай.
Ккулув дуссия хъинну ххуйсса МРО «Сельхозтехника», Ккуллал ва Лакрал районну автомашинарттал, техникалул щаллу дувайсса. БучIия кIа организация уттигу ччаннай дацIан дан.
Жунма цинявннан мудангу дакIний битан аьркинссар лакку маз ябавугу, Лаккуйсса жулла шяраваллу ядавугу, кIикку яхъанахъиминнал багьу-бизу буруччавугу цава ца мурадну хъанахъишиву!
МахIмуд Аьлиев,
ш. СумбатIул
