Августрал 11-нния шинмай онлайн-режимрай най буссар «Машук 2020» цIанилусса СКФО-лул жагьилтурал форум. Ва нантIиссар августрал 24-ннийнин. Вай гьантрай форумрай гьур­тту хъанахъисса жулла республикалиясса жагьилтуращалсса видеоконференция хьунни, ДР-лул цалчинма вице-премьер Анатолий Карибов ва жагьилтурал иширттал министр Камил Саэдовгу гьурттуну. Ванал ВКС-рай циняв гьурттучитал барчагу бувну, кIицI бунни республикалул оьрмулуву чялишну зана-кьала хъанахъисса, жяматийсса иширттавух хъуннасса гьурттушинна дуллалисса жагьилтурал биялдаралу душиву гьунттийсса кьини.

---

З.АьбдурахIманова
Гьашинумур форум ляли­чIисса хьунни. Амма умуд бишин ччай бур жува гьашинусса онлайн режимрайсса форумрайгу хьхьичIми шиннардийсса форумирттал аьдатру дурурччуну душиврийн. Хъинну ххариссару билаятрал даражалийсса конкурсирттай ва олимпиадарттай хьхьичIунсса кIанттурду бугьлагьисса, итххявхсса жагьилтурал кьюкьа шинная шинайн хъун хъанахъавриягу. Вагу «Машук» форумрая­сса хъинбалар.

Ларгмур шинал хьусса форумрая жула жагьилтурал делегация зана хьу­ссия 25,5 миллиондалунсса грантругу дурххуну. СКФО-лул регионнай жулламур республика цалчинмур кIанай дуссия. 835 проектрава жула жагьилтурал 156 проект лайкь хьуну ду­ссия грантирдан. Му хъунма­сса пахрулунсса ишри. Дагъус­ттаннал жагьилтурал хIарачатру республикалулгу, билаятралгу социал-экономикалуву бихьлахьисса ца бутIар. Гьашинумур форумрайгу зуйнсса вихшала хъуннассар. Багьайсса даражалий зулла кIулшивурттугу кка­ккан дурну, цIусса ххувшавурттащал ялугьлай буру зух», -увкунни А.Карибовлул.

Мукунма ванал барчаллагь увкунни пандемиялул чIумал волонтершиву дуллай бивкIсса форумрал гьурттучитурахьгу.
Ххал диргьунни шикку ларгмур шинал дурххусса проектру ва ми иширттайну дузрайн ду­ккавугу. Масалдаран, дукIусса шинал форумрай дурххусса грантирдал кумаграйну бювхъуссар МахIачкъалалив цаппара кIанттурдай спортрал майданну, мушакъатсса жагьилтурансса заргалтурал дуссукъа­тта тIитIин, табасараннал бартбисуртту щащайсса мастер-классру щурущи бан ва 20 жагьил зунсса кIанттурду бан.
Гьашинумур форумрайгу идеярттал чулуха авадансса, ххуй-ххуйсса проектру грантирдан лайкь хьунсса умуд буссар.