Августрал 18-нний Дагъусттаннал БакIчи Владимир Васильевлул дунни республикалий машинарттал ххуллул кьяйдарду лиян дуллалаву ласласисса суратирттал ва видеолул комплекс зузаврил масъала ххал бигьлагьисса батIаву.
Владимир Васильевлул тIимунийну, хIакьину республикалий зий бур 276 автоматрайну зузисса суратру ва видео ласайсса комплекс, миннул чIалачIи буллай бур ххуллул кьяйдарду щил ва цукун лиян дуллай буссарив, миннул чан буллай бур ххуллул апатIру, буручлай бур инсантурал оьрмурду.
Хъирив ихтилат буллай, ДР-лул ХIукуматрал Председательнал 1-ма хъиривчу ХIажимахIаммад ХIусайновлул бувсунни цIу бутIуй захIматшивуртту хъанай диркIшиву административ аьдлу-низам лиян даврил хIакъираву почталийхчIин уведомленияртту чичинсса ва тIайла дуккансса арцу диял къашаврил чулуха, яла лявкъуну бур арцу диял дувансса ххуллурдугу.
ДР-лул виваллил иширттал министрнал буржру чIумуйну бартбигьлагьисса Дмитрий Гутырял бувсунни хIадурну ушиву 276-гу автоматрайну зузисса видео комплексравату бучIайсса цинявппа информацияртту зана-кьала буллан.
ХIажимахIаммад ХIусайновлул тIимунийну, камерардал давурттайну шайсса дур сайки 700 млн. къуруш, ми дичинтIий дур светофорду дишин, ххуллурду гьарта буван, ттизаманнул ххуллийх бачаврил системалул управлениялун.
Микссара арцу дучIантIий дур аькIраятугу, мигу харж дувантIий дур ххуллул мюхчаншиву дуруччаврил иширттан.
Дмитрий Гутырял кутIану бувсунни ххуллул апатIирттал тагьарданул хIакъираву.
Мунал бусаврийну гьашину августрал 1-ннийнин 763 ххуллул апатI хьуну бур, микку ивкIуну ур 162 инсан ва цIунцIияртту хьуну дур 1024 инсаннан.
БатIаврий ххал бивгьунни цаймигу масъалартту. «Жува чан буллан аьркинссар ххуллурдал апатIру. Ххал бигьлагьисса масъалалул кьимат – инсантурал оьрмурду ва цIуллушивур», -кунни Владимир Васильевлул.
