Строительнал Кьинилул хъирив

«Аллагьнал инсан ля­хъан увссар, мунияр махъ аьрщарайсса цимурца тIурча, строительтуралли дурсса» тIисса, бачIи буниялану, бачIи хъярчирай буккан бувсса мукъурттил куртIнивун буххарча, оьрму бутланшиврул инсаннан дакъа чара бакъамур цимурца мяйжаннугу строительтурал карунних дур­сса дур. Лакравугу бур ларай­сса хьхьичIуннайшивурттайн лавхъсса строительтал, миннавасса цагу – ГьунчIукьатIрал шяравасса Закирдул ва Аслил арс, Дагъусттан Республикалул лайкь хьусса строитель, «СМУ-18» идаралул каялувчи Шамил Штанчаев.

---

Бадрижамал Аьлиева
[dropcap]В[/dropcap]анал каялувшиндаралу­сса управлениялул цIуну бувсса, бакьин бувсса объектирдал сияхI хъинну хъуннар, вайнна миннувасса цаппара: Республикалул урологиялул центр, ОьрчIал чIяру профиллу дусса азархана, Лениннул Комсомолданул цIанийсса парк, Гагариннул цIанийсса кIичIиравалу, чIявусса школарду, цIуллу-сагъшиву дуруччаврил объектру ва м.ц. Строительнал кьинилул гьантрай жул дянивсса ихтилатгу хьунни строительнал бусравсса давриясса.

— Шамил Закирович, чIявуми инсантуран ччай къабикIай цалва пиша цала оьрчIалгу язи бувгьуну. Му пишарал захIматшивуртту ва диялдакъашивуртту цанна ххуйну кIулну, ва цаймигу сававрттайн бувну бикIайхьунссар. Зул кулпатравурив му пиша сайки мукьулчинсса никирай най бур: вил ппу Штанчаев Закир ивкIун ур цIа дурксса строитель – Монгъолнавун ияннин машгьур хьусса, му билаятрал яла лараймур наградалунгу лайкь хьусса, ина ва вил арснал Закирдулгу мува пиша язи бувгьуну бур. Мукунма ина кIицI лавгуна вила оьрчIал оьрчIаягу строитель хьуну ччай бушиву…

[pullquote]ЦIанасса чIумал Да­гъусттаннай бур къат­ри бавриха зузи­сса 4215 идара, миннува 4016 – цивппа заллу­сса.
Ларгсса шинал жулла республикалий 170287,0 миллион къурушрансса давуртту дурну дур (2018-ку шинаяр 15,2 процентрал ххишаласса).[/pullquote]

— Ттун хъинну ччай бия строительнал пиша жулва кулпатраву гихунмайгу бачин бувну. Ва бур инсантуран хъинну аьркин­сса пиша. ХIакиннал къашайшала ччаннай ацIан увну, мунах уруглай, учительнал дуклаки оьрчIахь дарс дирхьуну, миннан хьхьичIмур дарсирайнияр хъиривмуний чIявусса затру лав­хьхьушиву чIалай, цалла даврил хIасиллах буруглай ххари хъанай бикIайсса кунма, строительгу гьарца кьини цалла дуллали­сса мюнпатсса даврия ххарину икIайссар. Жагьилнийва, нава мастерну зузисса чIумал, чIяру зивурду дусса къатта буллалийни, ттун яла тIааьнмур му бикIайва – зузи кьинилул ахирданий лавай, гьарца цIуну дурсса зивулийн лавхъун, кIия лагмава уруглан. Ттун хъинну ххирар ттулва пиша. Ци пишалул, ци оьрмулул унугу, гьарцагу инсаннан аьркин шай строительнал кумаг. Гьарца кьини ттуща бюхълай бур инсантуран мюнпат бусса даву дуван: цIусса къатрал ца ч1ира буван, кIичIираваллил ца бутIа бакьин буван. Ва бухьунссар строительнал пишараву яла тIааьнмур.

— ЧIявуну баяй «заказчиктал», «подрядчиктал», «тендер» тIисса махъру…

— Къатри буллалаву та дуркрив, мура чIумалли «заказчиктал» ва «подрядчиктал» тIисса махъругу бувксса. «Заказчик» – муштари, кьай тIалав дуллалима, строительствалувурив «кьай» – му цIусса къаттар, «подрядчик» – муштаринал тIалав буллалисса цIусса къатта буллалима, яни муштари «кьайлул» щаллу уллалима.
«Тендер» махъ бувксса махъ бур. ХьхьичIва, совет заманнай, на Дагъусттаннал строительствалул управлениялий зузисса чIумал, билаятрай хъинну чIявусса предприятияртту къатри буллай бикIайва, къатри бавриха зузисса идарарттурив чан­сса бикIайва. Гьарца завод, гьарца министерство гьарта-гьарза хъанай най бикIайва. ДакIнийри, Дагъусттаннал строительствалул управлениялий зузисса чIумал, шинал лахъишиврий дуванса давурттал план сакин дуваннин объединениялул начальникнал кабинетрал хьхьичI учирду дикIайва, шинал пландалувун цалла объектру, заводру, къатри бичира тIисса тавакъюращал бувкIсса министртурал, хъунисса идарарттал бакIчитурал, миннал нюжмарду дайва начальникнал цивппа кьамул буваннин.

Уттирив тагьар лапра даххана хьуну дур: билаятрай хъинну чансса къатри буллай бур, къатри бавриха зузисса идарарттурив чIявусса бур, къатри бувансса заказругу анжагъ паччахIлугърал чулухасса дур. ПаччахIлугърал хIукму бувссар тендерду дуллан – яни къатри бавриха зун ччисса предприятияр­ттал дянивсса розыгрыш дуллан. Тендерданий гьуртту хъанахъи­сса чIявусса подрядчиктурава заказчикнал язи угьлай ур къатри баврих яла лагьмур багьа увкума. Ттул пикрилий, ва къатIайлассар: оьккимур ххуйсса къадикIайссар. Махъсса шиннардий тендердавух гьуртту хъанан лап захIматну бур, заявка, кьутIи щаллу даншиврул аьркинну дур хъинну чIярусса арцу. Мунийн бувну хIакьину хьхьичIун ливчуну бур чIярусса арцу думи предприятияртту, бити цалла даву ххуйну къакIулсса бунугу.

 Инава заллусса, вилла каялувшиндаралу зузисса идаралия ци учин бюхъанссар? Та бухьурчагу, инсаннан цува заллумур тIитIин, гихуннай дачин дуван захIматну бикIайхха…

— 90-ку шиннардил дайдихьулий на «СМУ-4» идаралий хъунама инженерну зий уссияв. ЧIумуц1ун жул давривугу хьунни дахханашивуртту. Мукун, нава заллусса управление тIивтIуссия 1992-ку шинал. Гания шиннай личIи-личIисса чIунну дия, дуссия идаралий 100-ннийн бивсса инсантал зузиссагу. ЦIанасса чIумал 20 инсанная сакин хьусса коллектив бур, мигу – ччянияцIава зузисса. Дуссия даву шиннардийсса дацIаннара дурсса чIуннугу.
2000-ку шиная шинмай жу МахIачкъала шагьрулул чIала­чIиндараха зий буру, вай 20-гу шинал дянив къачансса давуртту дуварду, шагьрулул проспектру, Каспийскаллал бухмур трасса бакьин буварду.

— ЦIуну къатри бувансса, реконструкцияртту дувансса кьай-кьуй, стройматериал ча ласару?
— Жу хIарачат бувару стройкалуву жулла, кIанттул, материал ишла дуван, жулва цементрал, асфальтрал, бетондалул заводир­ттал дуккан дуллалимур ишла дуван. Балики диял къахъанахъисса духьурча, Аьрасатнава, чил билаятирттая дучIан дувару.

— ХIакьинусса строительствалул тагьар ккарккун, ппу ссая ххари хьунссия ва ссал пашман уванссия, вила пикрилий? Аьмну цIанасса строительствалия ци учин бюхъанссар?

— Так ца ппу акъа, га никирал цайми инсанталгу махIаттал хьунссия строительствалул даву хьхьичIуннай ларгсса куццуй. Хъинну чIявусса хъин-хъинсса инструментру, ярагъ бувккун бур. Га чIумал буттахъан болгаркавагу цирив къакIула. ЦIана хъинну чIярусса техника дур хьхьичIуннайсса, мукунна материал дур хъинну ххуйсса, къатри бавриву революция дурсса «пеноблокирттайн» бияннин. Ппу пашман анссия, ттул ттуллагу дакI зия дуллалисса, строительст­во коммерциялийн кIура дарну душиврул. Га чIумал инсантал зий бикIайва, харжру ласлай бикIайва ва бакIраву так ца пикри бикIайва – даву ххуйсса даражалий дуван. Уттирив, тендердугу дурххуну, щябикIлай бур гьарца кIапIикI ккалай, цанна циксса арцу личIан най дурив, даву цуксса кьюркьуну дуван хъанай дурив ккаклай.

Цуксса хIайпнугу, къатри баврил отрасль 90-ку шиннардийра «дурччунни», цукуннугу, махъсса шиннардий ци-дунурагу цIулаган дуван бювхъунни. ХьхьичIра зий диркIсса, давугу ххуйну кIулну диркIсса предприятияртту, чIумул захIматшивуртту духIан къархьуну, лирну ларгунни. Миннун кIанай дуркIунни даву щала ххуйну къакIулсса, цалва хьхьичI лапва цайми мурадру бихьлахьисса, даврихсса цамур бургаву дусса предприятияртту. Цурда вари учинсса строительстварагу дакъар цIана, так Рес­публикалул цIусса каялувчинал хIарачатрайн бувну цIусса школарду булларча бакъа. Умуд бур хьхьичIарасса строительствалул аьдатру цIулаганссар тIисса.
Ххуллурду бавурив ялуннагу хъинну анаварсса шаттирдай хьхьичIуннай хъанай дур, ялун ливчунни ххуллурдаха зузисса хъин-хъинсса организациярду.

— ГьунчIукьатIрал шяраваллил, лакрал цаймигу шяраваллал архитектуралия ци учин бюхъан­ссар?

— Жулмур шяраваллилгу дур Дагъусттаннал чIяруми шяраваллал куннасса архитектура – душманная мюхчан хъанан аьркиншиву гьануну ларсун щаллу дурсса. Яруссаннал ва жулла шяраваллал архитектура дур лар­хьхьусса, цанчирча жучIава къат­ри буллай хъунмурчIин ярусса бивкIун тIий, лакралми арамталлив – хIалтIилух арцу ляхълай, ляркъусса арцух къатри буллай. Махъ буллан бивкIунни цамур журалийсса къатри. ДакI ххари хъанай дур шяраву цIусса къатри ххи хъанахъаврия, цIусса ххуллурду буллай бушивруя. Гихунмайгу паччахIххуллия шяравунсса ххуллу цIубуллан, цIусса щинаххуллу буцлан най бур.

— Махъ ппурттуву ссаха зий буру, планнаву ци давуртту дур?

— Махъсса шиннардий жу хъунмурчIин кIичIиртту, ххуллурду бакьин бавриха зий буру. Аьмну билаятрай, республикалий къатри хъунмурчIин буллай бур инсантал цивппа заллусса. Ххуллурду баву тIурчан хъинну ххуйсса бущилий хьхьичIуннай най дур. Жугу вай махъсса шиннардий марцIну ххуллурдаха зий буру. ДукIусса шинал жу Кас­пийск шагьрулий «Безопасные и качественные дороги» программалул лагрулий 8 хъунмасса кIичIиравалу бакьин буварду, ва шинал МахIачкъалалив Кировский райондалий «Городская комфортная среда» программалул лагрулий чIяру зивурду ду­сса къатрал хIаятру дакьин дуварду. ЦIана цIунилгу зана хьуру Кас­пийскалив.

— Барча зул пишарал кьини, бусравсса
давуртту дуллай зузи­сса строительтал.