ЦIана Дагъусттаннай зий бур промышленностьрал ва производствалул журалул ляличIисса экономикалул зона (ОЭЗ) бавриха. Му бувантIий бур Къумтуркъалаллал райондалий Тюбелив «ЦIусса идеярттал ва технологиярттал дара» тIисса индустриал паркрал аьрщарай.
Мунил хIакъиравусса батIаву хьунни августрал 18-нний республикалул премьер-министр Артем ЗдуновлучIа. Мунал тIимунийну республикалий ляличIисса экономикалул зона баврицIун кабакьу бувну бур билаятрал каялувчинал даражалий. Тапшур бувну бур мунинсса заявка хIадур дуван, бур муниха зунсса инвесторталгу.
ХIакьину Аьрасатнаву сияхIрайн лавсун бур 26 ОЭЗ. Чачаннал зона бур 27-мур. Миннувату 10 бур промышленностьрал ва производствалул журалийсса. СКФО-рай мукунсса база бакъассар цавагу.
Паркрал лагру дур 194 гектар, микку илкинсса аьрщарал 82 гектар дур, цIусса резидентътал битансса.
ЦIанасса ппурттуву сакин бувну бур цаппара идарарттал дянивсса зузи группа, хIадур буллай бур та кIанттул бизнес-пландалун, инфраструктуралун хасъсса документру. Му зоналул ца яла хъунама резидент хъанахъиссар «Каспийскаллал пюрундалул завод» ОАО.
Проект дузрайн дуккан дуван личIи дурну дур 10,5 млрд. къурушру.
Республикалул премьер-министрнал тапшур бунни ми масъаларттаха зузисса цинявннайн чялишну гьуртту хьун ОЭЗ дузал баврил давурттавух.
