Августрал 19-нний ДР-лул БакIчинал ВКС-рал низамрай дунни республикалул строительствалул арарду зузалтрал дузал баврил масъаларттал хIакъиравусса батIаву. Муний гьуртту хьунни мурадлувсса министерствартту ва идарартту, строительствалул идарарттал каялувчитал.
Владимир Васильевлул тIимунийну, хIакьину республикалул строительствалул объектирдай биялну бакъар зузалт. Мунийн савав хъанай дур жулла республикалия Азирбижаннал инсантал лагаву, яла пандемиялул чIумал миннаща зана хьун къашаву. Миннавасса чIявуми зий бивкIун бур строительствалул объектирдай.
Гьашину жучIава буллан най бур 180-нния ливчусса строительствалул социал объектру ми проектирдал багьа бур сайки 25 млрд. къуруш. Миннуха зий бур 4 азарунная ливчусса инсантал, чIявуми бур дагъусттанлувтал.
Дагъусттаннал строительствалул ва ЖКХ-лул министр Малик Багълиевлул бувсунни цIанасса ппурттуву строительствалул аралуву 2200 инсан иялну акъашиву. Мунал бувсунни къабиял хъанахъисса зузалт ча буцин аьркинссарив, миккун зузалт кIункIу буваншиврул ци буллан аьркинссарив.
Ихтилатру бунни мукунма АьФ-лул Минобороналул управлениярттал вакилтурал, Ухссавнил Ккавкказуллал федерал округрал Строительствалул гилдиялул каялувчи Аьли Шагьбановлул, ДР-лул УФСИН-далул хъунама Андрей Поляковлул.
Масъала ххал бигьаврил хIасиллугу дурну, цаппара тапшурлугъругу дунни Владимир Васильевлул.
