Аьлил арс Аьшаев Нуруллагь
Август зурул 9-нний, захIматсса азарданул къашавайгу ивкIун, оьрмулул 78 шинаву жуятува батIул хьунни Аьлил арс Аьшаев Нуруллагь.
Буттал шяраву Вихьлив арулла шинал школа къуртал бувну махъ Нуруллагьлул бувккуну бур МахIачкъалаллал медучилищалул фельдшернал отделение. Му къуртал бувну мукьах зана хьуну ур Ккуллал райондалийн, зий ивкIун ур райондалул азарханалул медбратнугу, Вихьуллал участокрал фельдшернугу.
1963-ку шинал Нуруллагь увххун ур Дагъусттаннал мединститутравун, дуклайгу унува, зий ивкIун ур МахIачкъалаллал 2-мур азарханалул хирургиялул отделениялий. Институтрава армиялийн увцуну, тиккугу зий ивкIун ур фельдшернал пишалий. Тичча зана хьуну махъ къуртал бувну бур институт. Муния мукьах зий ивкIун ур Чачаннал республикалий Гудермес шагьрулул азарханалий терапевтну.
1978-ку шиная 2000-ку шинайн ияннин Нуруллагь зий ивкIссар Ккуллал райондалул азарханалул каялувчину. Зий ивкIссар мукуна Госсанэпиднадзорданул ва Роспотребнадзорданул жаваблувсса къуллугъирттайгу.
Аьлил арс Нуруллагь Аьшаевлул хIалал дурссар Дагъусттан Республикалул лайкь хьусса хIакиннал цIа, диялсса грамотартту ва медаллу.
Ккуллал райондалул шяраваллал жяматирттал цIаниятугу, ттула цIаниятугу дакIнийхтунусса пашманшивугу кIидачIлай, жижара буллай ура Нуруллагьлул кулпатрахь ва махъсса гъан-маччаминнахь. Цал бунагьирттал аьпа баннав, рухI паракьатний дишиннав.
Нуруллагьлуятусса аьпа абадлий личIантIиссар Ккуллал райондалул агьалинал дакIурдиву.
Ккуллал райондалул
бакIчи Ш.Р.Рамазанов
Нуруллагьлул арс Аьшаев Салим
Август зурул ххюнний Вихьуллал шяраваллил чIявусса инсантал пашман хьунни. Ва кьини, цIуцIаврища ххассал хьун къабювхъуну, ахиратравун лавгунни Аьшавхъал Нуруллагьлул ва КIуруххъал ПатIиматлул арс Салим. Салим уссия хъинну инсантал ххирасса, цала касмулул давугу эбратну биттур дувайсса, куртIсса кIулшиву дусса учитель. Салим ия тарихрал дарсирал учитель.
Салим увссар МахIачкъалалив, ванал нину-ппу Мединститутраву дуклакисса чIумал, 1969-ку шинал. Муния махъ ванал бутта Нуруллагь ва нину ПатIимат, институтгу къуртал бувну, цаппара шиннардий зий буссия Чачаннал республикалий. Яла вай зана хьуссар Лаккуйн. Салимлул мяйва класс къуртал бувссар ЧIяйннал школалий, бувккуссар Буйнакскаллал педучилище. Хъирив къуртал бувссар Дагъусттаннал педуниверситетрал тарихрал факультет. Учительну зий ванал хьуссар 29 шин. Ва цувагу ия лахъмур категориялул учитель. Салим цимилгу гьуртту хьуссар дарсру ххуйну дишайми учительтал язи бугьлагьисса конкурсирттавух. Ларгсса шинал ахирданийгу ванал Ккуллал райондалийсса школарттай тарихрал дарс дишаврил учительтурал дянивсса конкурсрай цалчинмур кIану бувгьуна. ХIайп, ччяни лавгунни ттул ссурахъил ссил арс. Аьпа баннав цал. Салим муданагу жул, гъанссаннал, дакIурдиву личIантIиссар.
ХIажимурад ХIусайнов
ш. Вихьул
Р.s. Ххюва гьантлува, август зурул 10-нний, Салимлул хъирив, аьпалул хьунни ванал ппу Нуруллагьгу. КIива бивкIу ца кулпатраву нюжмардул дянив шаву гьакссагу захIматсса иш бур. Цува цайми хъин буллай, чIявусса инсантал ххассал бувсса хIакинъя Нуруллагь. Цал бунагьирттал аьпа баннав.
Сулайманов Ибрагьим Камиллул арс
Вай гьантрай, лавмартсса цIуцIаврища ххассал къавхьуну, 58 шинал оьрмулуву жуятува личIи хьунни Гъумучатусса Сулайманов Ибрагьим Камиллул арс.
Ибрагьим увну ур мартрал 10-нний 1962-ку шинал. ЗахIматрал ххуллу байбивхьуну бур 1979-ку шинал. 1988-ку шинал ванал къуртал бувну бур Свердловскаллал юридический институт ва зун ивкIун ур Тюменнал областьрайсса Гольшанский райондалул прокуратуралий следовательну. Му даврий зузиссаксса хIаллай лавхъун ур «Лукойл-Уралмаш» тIисса акционер сакиншиндарал отделданул хъунаманал къуллугърайн. 1997-ку шинал майрай кьамул увну ур Ханты-Мансийскаллал автоном округрал «Югры» тIисса ххуллурдал департаментрайн, яни цIанасса КУ ХМАО-рал Автомобиллал управлениялул хъунаману. Уттинин зийгу ивкIссар му къуллугърай.
Ибрагьим лайкь хьуну ур личIи-личIисса наградарттан: Ханты-Мансийскаллал округрал губернаторнал чулухасса ХIурматрал грамоталун, «Югры» тIисса Транспортрал ххуллурдал ва хозяйствалул департаментрал чулухасса цимивагу барчаллагьран.
Ибрагьимлул кьурчIисса бивкIулул жижара буллай буру ванал ниттихь, кулпатрахь, оьрчIахь, уссур-ссуннахь. Цал бунагьирттал аьпа баннав, рухI бигьаний дишиннав.
ГьунчIукьатIрал
ва Гъумучиял жямат
ДакIнийхтуну хъуннасса кьурчIишиву кIидачIлай ура ттула хьхьичIунсса дус-ихтивар, цIанихсса хIакин Аьшаев Нуруллагьлул кулпатращал, щалва агьлу- авладращал ппугу, арсгу
НУРУЛЛАГЬ ва Салим
ахиратрал шаврийн бувну.
Аьшаев Нуруллагьлул цIаницIун бавхIуну бия Ккуллал райондалул цIуллу-сагъшиву дуруччаврил тарихрал ца биялсса мутта.
Ва хъунама хIакинну зузисса манзилданий Ккуллал райондалул азарханалул цIа республикалий хьхьичIунсса ххуттай дуссия. Нуруллагь илданун бусравну ия дакI марцIсса, бюхъу бусса каялувчи ва за кIулсса, ка сававсса хIакин хIисаврай.
Ци кIулссия, дус, цикссагу оьрмурду ххассал бувсса ина лавмартсса цIуцIаврил жущава зеххинтIишиву !
Алжаннул ххари аннав ина, рухI хъинний дишиннав! Махъ ливчIминнал оьрмурдай барачат бишиннав!
Загълиевхъал
кулпатрал цIания Сажид
Хъуннасса кьурчIишиву кIидачIлай, дакIнийхтунусса жижара буллай буру Хъусращиял жяматрахь, шяраваллил бакIчи, жуна цинявннанагу бусравсса
ХIажиев Эдуард АхIмадханнул арс
ва Ванатиев Жамалуттин Ванатил арс
оьрмулул нязаннив хар-хавар бакъасса апатIрал жуятува батIул баврийн бувну.
КIинналагу рухIру хъинний дишиннав, Алжаннул ххари баннав! Махъ ливчIминнал оьрмурду лахъину лякъиннав! Щала щарний барачат бишиннав!
Лакрал театрданул коллектив
Жу, 1960-ку шинал ГьунчIукьатIрал школа къуртал бувсса оьрчIру-душру, дакIнийхтунусса жижара буллай буру Ларисахь ва Заремахь, жулва ххирасса учительница, жул классрай каялувшивугу дуллай бивкIсса
Жамисат МахIаммадовна
дунияллия лагаврийн бувну. ЧIярусса шинну ларгун дунугу ва жул дакIнияту къабуккай. Жун Жамисат МахIаммадовна дакIний ливчIунни кьянкьасса тIалавшин дусса, амма мунищала архIал хъинну за бувчIусса ва ххишала бакъа цилва пиша кIулсса учительницану. Ва бия ссавур дусса, захIмат ххирасса, дуллалисса даврил жаваб дулун хIадурсса инсан. Жуву дуккаврих ччаву ванил хьун дайва, гьарцагу ученикнан цан лархьхьусса сант лякъайва. ЧIявусса бусравсса, лайкьсса учительтал бусса ГьунчIукьатIрал школалийгума ва бикIайва ляличIину хьхьичIунну чIалачIисса.
Жамисат МахIаммадовна жул дакIурдиву личIантIиссар даимгу. Ванил махънал оьрмурдай барачат бишиннав, имандалий лавгун лякъиннав, гьав нурданул дуцIиннав!
Ца классраву дуклай бивкIминнал
цIания Дандамаев Давуд
