Августрал 16-нний ДР-лул шяраваллил хозяйствалул ва бакIлахъиялул министр Абзагьир ХIусайнов хьунаавкьунни «Эко-Культура» тIисса агропромышленностьрал холдинграл каялувчинащал. Микку ххал бивгьунни республикалий 200 гектарданийсса теплицарду баврил масъала.
Хьунабакьаврий гьуртту хьунни министрнал цалчинсса хъиривчу Шарип Шарипов, ххяххиярттал ва багъирдал отделданул хъунама АхIмад Расулов.
«Эко-Культура» АПХ-лул директор Николай Барышниковолул ва холдинграл Президентнал советник Валерий Котиклул бувсунни компаниялул планнаяту.
Дагъусттаннал БакIчи Владимир Васильевлуйнсса чагъарданий агрохолдинграл президент Александр Рудаковлул бувсун бия республикалий 200 гектарданий теплицардал комплекс бансса инвестициярттал проект дузрайн дуккан дувансса пикри бушиву. Му проект бартдигьинсса ният дур 4 ятIапрай, гьарца ятIапрай 50 гектарданий, аьмсса харжлугъ хьунтIий дур 30 млрд. къуруш.
Абзагьир ХIусайновлул барчаллагь увкунни инвесторнахь республикалий давуртту дуллан дакIнийн багьаврихлу ва бувсунни проектраяту хъунмсса мюнпат хьунтIий бушиву республикалун. Министрнал кIицI бувунни аьркинсса кумаг буван хIадурну ушиву проект бартдигьаврил ххуллий.
Яла инвесторнал вакилтал министрнащал архIал лавгунни республикалул районнайн теплицарду бувансса аьрщи личIи дуван.
