[dropcap]И[/dropcap]юль зурул 1-нний, Аьрасатнал Федерациялул Конституциялуву дурсса дахханашивурттахлу чIурду буллалисса кьини,
ЦIуссалакрал райондалул центрданий шадлугърал даражалий тIивтIунни оьрчIансса парк ва спортрал майдан.
Имара Саидова
ЦIусса объектру тIитIлатIисса мажлисрай гьуртту хьун бувкIун бия ДР-лул экономикалул министр ХIажи Султанов, ДР-лул Халкьуннал Мажлисрал депутат Амирхан Амирханов, ЦIуссалакрал райондалул хъунама МахIаммадхIажи Айдиев, ЦIуссалакрал шяраваллил бакIчи Сулайман Рамазанов ва ЦIуссалакрал райондалул идарарттал каялувчитал.
Райцентрданийсса оьрчIансса паркраву бур ччехху бигьайсса качеларду, каруселлу, тIуркIулул къатри бусса цанмасса мурцIу ва жагьилтурансса спортрал майдан.
Бусравсса хъамаллурал ятIул лента кьувкьуну махъ парк ва спортрал майдан дазу-зума дакъа ххари хьусса оьрчIал ва жагьилтурал бувцIуна. Му бакъассагу, шикку оьрчIайх дачIлай бия мороженайрду ва нацIу-кьацIуртту, хъуниминнансса хъамалушиндаран бувну бия узбакIнал пулав ва лакку дукрарду.
Щаллусса кьини инсантал таза-тяхъа буккан буллай, балайрду тIий бия райондалул Культуралул управлениялул зузалт.
Конституциялийн дахханашивурттахлу чIурду булун бувкIминнан къулайну бикIаншиврул, паркрал ца мурцIув гьавалий тIиртIуну дия 1167-мур участок.
ЧIурду булун бувкIмигу, бигьалаган, бялахъан бувкIмигу дакIнихтуну барчаллагьрай бия вай ххаллилсса давуртту дурминнайн.