ГьунчIукьатIрал школалул дуклаки оьрчIру
Лакрал райондалул дуклаки оьрчIал гьарца шинал чялишсса гьурттушинна дай ГТО-лул кьараллу дулавриву.
Райондалул культуралул, туризмалул ва спортрал иширтталсса буллалисса центрданул хъунаманал хъиривчу Малик ХIусмановлул бусласимунийн бувну, гьашину ми кьараллу дуллуну дур кьуя выпускникнал, миннава ацIния кIиннал – мусил лишандалунну.
Вай гьантрай Малик ХIусмановлул ГТО-лул мусил лишанну дуллунни Гъумучиял школа къуртал бувсса Кьурбанов ХIасан-ХIусайннун, Бархуев МахIаммадлун, ХIасанов Намрутлун ва ГьунчIукьатIрал школа къуртал бувсса Къушиев Нариманнун, ТIагьиров Булганинан, МахIаммадов Салимлун, Юсупов Халипанан.
ГьунчIукьатIрал школалул директор Малик Къушиевлул мусил лишанну ларсми барчагу бувну, кIицI лавгунни вай цинявппа дуккавриву ва спортраву хьхьичIун ливчусса оьрчIру бушиву, Дагъусттаннал ва Аьрасатнал чемпионатирттай хьхьичIунсса кIанттурду бувгьусса. Масалдаран, ТIагьиров Булгани СКФО-лул закканттай буккаврил чемпионатрай гьашину хьуну ур арцул призер.
ХIадур бувссар
З. Тахакьаевал
