[dropcap]Д[/dropcap]агъусттаннал машгьурсса альпинист, ца-цасса цIанихсса зунттурдал бюхттулния дунияллух ябивтсса, бюхттулшивуртту мютIи дуллан ххирасса, цIиникьрал хъапалий сивсуну
цимивагу зунттул мицIлийн лавхъсса чув, ГьунчIукьатIрал шяраватусса Зиябуттин ХIажимирзаев, вай гьантрай ПпабакIуйн гьаз хьунни цала арснащал архIал. «Илчилул» редколлегиялул членгу , миллатрал мазгу, миллатгу дазу дакъа ххирасса хIакьсса патриотгу ухьукун, битайххивав Зиябуттиннул «Илчилул» ттугъ ПпабакIуйн къалавсунгу?!
ПатIимат Рамазанова
[dropcap]П[/dropcap]пабакIул бюхттулнийсса «Илчилул» ттугъ Зиябуттиннул социал сетирдайсса суратирттай ккаккайхту, пахру хIаласса асарду багьунни дакIнивун. Ми асарду сайтралми буккултращал кIибачIин анавар бувкссияв нагу. Утти зущал, кказитрал чагъарданиймур вариантрал буккултращалгу, кIидачIлай бура хъиннува ххарину.
— Лахьхьу чIивима арснащал ПпабакIуйн гьаз хьуру. Гьава цIу бутIуй ххуйсса бия, дарусса кьини дия, амма яла цакуну тIабиаьт даххана хьуна. Жу 3800 метра ритайхту, микI бичлай байбивхьуна, микIиравух гьаз хъанан багьуна. Ялавай бучIайни тIурча, чявхъа гъарал ларчIуна, чявхъагъаравух бучIлан багьуна. КIива гьантлул хIасиллу: 40 километралул лахъишиврийсса манзил, 2000 метра лавай гьаз хъанай, микссара – ялавай бучIлайгу. Хъинну дяркъусса щинащалсса гьалаксса зунттал неххардивунгу шамийлва буххан багьуна лялун бияннин, кIийлла хьхьурай нех лахълан багьуна. Яла хьхьуниву бивнав Буршай кьабивтсса машиналучIан. Ссят ххюнний кIюрххицIун бивунав МахIачкъалалив», — укун чичлай ур Зиябуттин аккаунтрай.
[dropcap]Б[/dropcap]уккултран дакIнийн бутанну Зиябуттин ХIажимирзаев дукIу кIинттулгу марххалттанул замгьарданувух ва зунчавух ПпабакIуйн гьаз хьуну ивкIшиву ва танигу ванащал марцI- кIяласса ПпабакIул бизанттая «Илчилул» ттугъгу палцIа тIий бивкIшиву. Зиябуттиннул мютIи бувсса зунттурдал сияхIрай буссар: Африканал Килиманджаро, Американал яла лахъмур вулкан Орисаба (5636 метра), дунияллийсса ца яла лахъмур вулкан Охос- дель- Саладо (6893 метра), мукунма Аконкагуа , Монблан. Ва мукьийла гьаз хьуну ур Эльбрусрайн.
Ина цIуллу ивуй, Зиябуттин! Вил бюхттулсса лахъазанттайнсса ххуллурду ттиния тинмайгу Зал архIалсса ва «Илчи» кказитрал ттугъгу кIунттихьсса шаваннав! Бюхттул зунттурдая дунияллух ябитавансса гъирагу, бюхъугу буну итаннав!
