ДР-лул Миллатирттал политикалул ва диннал иширтталсса бувайсса министерствалул ва «Лезгинка» ансамбльданул цачIуну хIадур дурccа «ТIутIив – хIакинтуран» тIисса цIанилусса акция хьунни вай гьантрай.
МахIачкъала шагьрулул 3-мур азарханалул хьхьичIсса майданнив хьунни Медициналул зузалал кьинилун хасну дуллалисса акциялул лагрулийсса батIаву.
Бадрижамал Аьлиева
Миннацрал бакIчи Энрик Муслимовлул увкусса куццуй, жулва медиктурал гьарца кьини дуллай бур виричушивуртту, цIуну ялун дирсса вирусращал талай, миннал буллалимур цалий бишин бучIир дяъвилул шиннардий медициналул зузалтрал буллай бивкIмунищал. ОьхIалсса вирусращал талай, цивппа оьрмулуцIа хьусса медициналул зузалтрал гъан-маччаминнахь жижара буллай, министрнал кIицI лавгунни миннал дурсса виричушиву республикалул агьалинан хъамакъаритантIишиву. Медициналул зузалтрал пишакарсса кьинигу барча дурну, Муслимовлул миннан дуллунни грамотартту ва тIутIив.
Медициналул зузалтрахь барчаллагь тIутIисса ихтилат бунни «Лезгинка» ансамбльданул гендиректор Жамбулат МахIаммадовлулгу.
