«Ххуйсса касмукар шавур агьаммур мурад»

Аьжа Кьаландарова

[dropcap]В[/dropcap]ай гьантрай билаятрал сийлийсса вузирдал выпускниктурал нитти- буттахъул ва преподавательтал ххари бунни дипломру ласаврийну. ЯтIулсса рангирал диплом лавсминнаннив биял­сса хIарачат буван багьссар кIулшивуртту куртIгу,

цIакьгу дуллай. ЯтIул диплом – му бигьанмасса тIайлабацIу бакъархха, кIулшивурттал хъирив багьаврил хIарачатрал хIасиллур. ЯтIул дипломрал заллу хьунни Халкьуннал хозяйствалул ва ПаччахIлугърал къуллугърал Аьрасатнал академия (ванийн кутIану РАНХиГС учай) къуртал бувсса Аьжа Кьаландаровагу.


ПатIимат Рамазанова
Цалчинмур курсирай дуклайнива буссияв ятIул диплом ласун­сса хIарачат бувансса пикри, тIисса ттул суалданухьхьун жаваб дуллай, Аьжал увкунни:
— ДакIнихтунура тIисса, ятIул дипломрал балаллий къабивкIра. Ттул пикрилий, ххуйсса касмукар шавур агьаммур мурад. Ттул мурадгу нара язи дургьусса касму ххуйну лахьхьавуя. На школалийгу марцIну ххювардай лахьлай бивкIра, микку нитти- буттал тарбиялул ягу, учиннуча, вардишсса закалкалул ишгу бухьунссар, ххуйну лахьлан аьркинссара мудангу, гьар кIанайгу! Лахьлан гъира бухьурча, циванни марцIну ххювардай къалахьлан!
МуницIунма, Аьжа дакI дар­цIуну бур ятIул диплом, пахрулунсса документ бакъагу, ххуй­сса даврийнсса ххуллу тIитIай кIуланугу хъанахъишиврий. Давурттайн буцлацийни, ятIул дипломирттал заллухъру хьхьичIунну бушиву. ­Аьжал, магистрнал даражалийсса дипломгу ласуншиврул, юристътал хIадур бувайсса вузрал магистратуралийн буххансса хIукму бувну бур.
«Ларайсса кIулшиву ласаврил барашин дуллалисса диплом – инсан ларайсса кIулшиву ларсъсса касмукар хьушиврул ахир- бази дуллалисса документри. МуницIунма, цIусса дуккаврил ва цIусса ххуллулгу дайдихьур. ХIакьину ххуй­сса юристътал тIалавну бур, чув, ци идаралий зурчагу, даву ххуйну, куртIну кIулсса юристнал иш бачинтIиссар. Нагу юриспруденциялул кIулшивуртту гьарза- гьартану лахьхьин ччай бура, законну кIулшиврия зарал бакъархха. ЦIанакул магистратуралул программалувун кьувтIуну бура», — тIий бур Аьжа.

Аьжал мархри Бархъаратусса бур. Дагъусттаннайгу, республикалул кьатIувгу дюрхъусса бизнесрайну ва жяматийсса иширттайну ххуйну кIулсса Расуллул ва Марияннул душ бур. Нарив дакI дарцIуну бура ва машгьурсса фамилия жунна уттигу баянтIишиврий цIанихсса юристътурал кьюкьлуву. Циван чирча, Аьжа Кьаландарова хьхьичI бивхьусса мурад барт къабивгьуну къабитайсса хасият дусса душ бур. Ва ялагу бур творчествалул инсангу. Музыкалул чулухагу итххявхсса бур, магьирну суратругу дишай. Ххирар ингилис маз ва дизайнершивугу. Миккугу сайки циняр кIицI ларгсса магьирлугъирттаву ванил аьлтта чIалачIисса ккаккияртту хьун дурну дур. Ванил гьунардал гьанумур мурадгу цинма гъира бумунихун машхулну неъмат ласаву бур.

«Ттун къабувчIай, ци дуллант1иссарив къакIулли тIий, ташвишну ливчIсса инсантал. Нарив муданмасса мажал бакъура, ттулмур кьини бурувгун буруганнин лагай. Цикссагу курсру бурхха жура- журасса, агар ссал- бунугу хIакъиравусса кIулшивуртту цIакь дуван ччарча. Ттун чIун диял къашай. Бюхъайссар гьунттий ттун, учиннуча, цамур кьатIаллил билаятрал маз лахьхьин ччан бикIангу», — тIий бур Аьжа.
ЧIа учинну дуккавривугу итххявхсса, гьунардугу сахаватну буллусса ва яла-яларив, кIулшивурттах мюхтажсса, захIматшивриягу хIучI къатIисса бархъарадушнин – Аьжа Кьаландарован тIайлабацIу!