Хъун дяъвилул фронтрай, ттупангру канил бувгьуну, талай, ягу аьралуннавусса корреспондентъталну зий бивкIссар лакрал цIа дурксса чичултгу,

шаэрталгу: Апанни Къапиев, Абачара ХIусайнаев, Мирза МахIанмадов, Минкаил Аьлиев, Аьбдул Мирзаев, Абакар Мудунов ва м.ц.
Фронтрайн къалавгми чичултгу хьхьу-кьини къакуну зий бивкIссар, дяъвилийн лавгсса гьалмахтурал данмургу цала дуллай, Совет билаятрал цIакьшиву гуж дуллай, агьалинавун чувшиву рутлай. КкавкказначIан душман гъан хъанан ивкIукун, АбутIалиб Гъапуров, Юсуп Хаппалаев ва Салимат Кьурбанова цала хушрай лавгссар, дяъвилун аьркинсса цIакьшивуртту дуллан, захIматрал фронтрайн, душманнал танкарду къагьан­сса кьакьарду, барурду буллан. Цайми мукъурттийну учин, литературагу талай диркIссар душманнащал.

---

1943-ку шинал буккан буллан бивкIссар «Дагъусттан – цала фронтовиктуран» тIисса чIумуйнусса кказит. Ганий бищайсса бивкIссар фронтовиктурал чагъарду, чичултрал очеркру, шаэртурал назмурду, дяъвилул ва захIматрал вирттаврал дуллалимуниясса хаварду ва м.ц. Фронтрайн лавгсса чичултрал Дагъусттаннайн гьан бай­сса бивкIссар шеърирду, хаварду ва очеркру.
ЧIярусса митингирдай шаэртал махъру лахълай бивкIссар, буттал кIанттухсса ччаврил асарду халкьуннаву гужлан буллай, гайннавусса душманнайнсса зид ххи буллай.

Дагъусттаннал халкьуннал шаэр АбутIалиб Гъапуров Грознайлий 1942-ку шинал августрал 19-нний дартIсса Ух­ссавнил Ккавкказуллал митинграй тIий ивкIссар: «Зунттал агьалий! На зуйн оьвтIий ура, жула цIа дурксса ппухълу кунма, оьрмулий рахIму къабувну, тархъаншиврухлу, талихIсса оьрмулухлу талатияра тIий…. На шаэрда. Ттул ярагъ – ххюра ххал дусса чугурди. Ва кIюласса путIи-баламанни. ХIакьину ттун чIалай бур, нава хъунав хьуну ухьурчагу, ярагъ баххана бан аьркинсса чIун дуркIшиву. Мунияту на, ттула чугургу цалсса тинмай бивтун, уттигу цIакьсса каруннахьхьун ласлай ура ттупанг».
Дяъвилул шиннардий цала назмурдаву А. Гъапуров оьвтIий ур циняв миллатирттайн, Ватан ядан гьаз хьияра тIий. «Вирттаврал марш» тIисса назмулуву бур укунсса бюххансса махъру:

ЗахIмат кьини дучIайсса
Вирттаврал бакIрачIанни,
Вирттаврал балай чайсса
Укунсса кьинирдайри.

Дяъвилул шиннардий Юсуп Хаппалаев ивтун ивкIссар ЗахIматрал аьралуннал батальондалул комиссарну. Дяъви байбивхьусса цалчинсса гьантрай мунал чивчуссар «Буттал кIану оьвтIий бур», «Циняв! Циняв!», «Фронтран», «Нажагь хилип хьурча» тIисса яргсса шеърирду. Шаэр хъа буллай ур циняв лакрал жагьилтурал цIания:

Нажагь хилип хьурча
Ттул дакI вийн, Ватан,
НякI ссав буркIна хьувча
Сагъну уна ттун!

Дяъвилул шиннардий Ю. Хаппалаевлул хIадур був­ссар «Хан Муртазяли» тIисса лакрал эпосрал свод ва чивчу­ссар цалва «Хан Муртазялиха­сса балай» тIисса поэмагу. Поэмалувусса вирттал, Муртазяли бакIчину, халкьуннал, буттал кIанттул тархъаншиврул цIаний талай бур.
Дяъвилул чIумал чивчумунил дур ца агьамсса ишара: гайннуву бур душманнайнсса зид ва Бу­ттал кIанттухсса ччаву, гайннува пIякь бивкIун чIалай бур шаэр цува дяъвилий гьуртту хьуну ивкIшиву, гай ххару чивчу­сса кIану ва чIун. Миннул буслай бур назмулул сипатру оьр­мулува ларсъсса душиву, асарду, фронтрай хьусса иширттал гьалак увну, шаэрнал дакIнива ливчусса бушиву.

Апанни Къапиев, цува захIматсса къашайшиврухь унува, цала хушрай лавг­ссар Ухссавнил Къапкъазуллал фронтрайн, корреспондент хIисаврай. Ганал макьалар­тту ришлай диркIссар «Ватандалухлу – ххувшаврийн!», «Да­гъусттаннал правда», «Дагъусттан – цала фронтовиктуран» тIисса кказитирттай. Дяъвилия ганал чивчумур бавтIссар «Фронтрал очеркру» тIисса луттиравун. Апанни Къапиев ивкIуссар 1944 шинал Пятигорскалий, лякьлуй бувсса операция бухIан къавхьуну. Дяъви къуртал хьуну махъ итабавкьу­ссар дяъвилун хас бувсса Апанни Къапиевлул «Чичрулул таптардугу».
«Най бур хъинну оьсса, рахIму бакъасса, циняв дяъвирдаву яла тIайламур дяъви, – тIий чичлай ур А. Къапиев дяъви байбивхьусса гьантрай цала дневникраву. — Шикку, хIала къавхьуну, тинай ацIан къабучIир. Чичул сянат рахIатсса сянатран ккалли дайссия… амма утти чичултгу дяъвилуву бур. КъабучIиссар, хIала къаувххун, тинай ацIан».
Апанни Къапиевлун бувчIлай бур дяъви захIматсса, бала­сса, нигьал ва хьуллил дянивсса хIал ккаккаву бушиву: «ДакIний бити, Къапиев! Заназу, уруглагу ва дакIний бити, цанчирча хIакьину хъанахъимур цимурца – ми тикрал къахьунтIиссар: аьрщарай тачIав, тачIав ххишала ваниха лавхьхьусса цичIав къабикIантIиссар».

Буттал кIанттучIан нигьа­чIаву гъан хъанахъисса кьинирдай, 1940-ку шинал, Абачара ХIусайнаев дуклан ухлай ур КIапIкIайливсса ЯтIул Аьралуннал училищалувун. 1941-ку шинал сентябрь зуруй училищалул курсантътуран хIаписарнал чиннугу дуллуну дур. А. ХIусайнаев ва ганал гьалмахтал гиччава тIайла бувккун бур фронтрайн. Фронтрай ганая хьуну ур хъунама лейтенант, взводрал командир.
Фронтрай А.ХIусайнаевлул чирчуну дур «Дон», «Харьков жулар», «Шахшахъал Аьлихь», «Ттула чанглихь», «Лачин Исмяил», «АхIмад-Хан Султан – ссавнил пагьливан», «Душнияту ­аьрайн», «ОьрчIая шаппай» тIисса ва цаймигу назмурду.
Душманнал хьхьичI ацIан хIадур хъанан ивкIукун, Абачарал «Хъамалушин» тIисса гуж­сса шеъри чивчуссар:

НацIур, тIар,
душманнал
Гьидилданул щин,
НацIур, тIар,
Къиримнал
тIутIи, апельсин…
Ххирассар жун
хъамал,
банну хъамалу
Миннуяр
ххаллилсса
дарцIусса чIутIул,
Буванну
буччиххан
чаннаннил ччаллал.

«Харьков жулар» тIисса назмулувугу А. ХIусайнаев ур дяъвилул ишру дунияллул тарих­рацIун бахIлай, яла бюхттулми полководецтал – Ганнибал, Зулкьарнай, Цезарь, Суворов дакIнийн бичлай. Бюхттулсса полководецтурал цIардал ЯтIул Аьралуннал ларсъсса ххувшаврил сий лапра ларай дурну дур. Гайннийну цурда назмугу чIюлу хьуну дур:

Арпачай, Сена, Дунай
Дунура вийн икрамрай,
Шайссияв, ухьттансса Дон,
Ина Рейндалийн мютIий!

Шайссияв гъагъан буван
Вил буттал буттахъал яхI,
Гъавгъунникьай, кьярш куну,
Душманнал цаламур бархI.

А. ХIусайнаев дакIнийн бутлай ур лакралмур тарихгу, бу­ттал кIанттухлу талан эбратну ккаккан дурсса дагъусттаннал полководецнал Муртазялил тур. «Гъумучиял шагьрулухь» тIисса шеърилуву бур укунсса махъру:

Ватандалул цIаний
Талай цIу яргний,
Вирттаврал хъазамру
Барурду шайний,

Вил муси кIикIайсса
Магьир каруннал
БувцIуссар душманнан
БивкIулул бокал.

Ххаллилсса асарду чантIатIи буллай бур «Гъумучиял шагьрулухь» тIисса ва назмулул: буттал кIанттул виричусса тарихраясса пахругу, даврийгу чувшиву кка­ккан дансса таваккулгу, оьрмугу, инсанталгу ххуй хьуншиврийн­сса умудгу.

Лакрал дяъвилул чIумалсса поэзиялуву ляличIийсса кIану бугьлай бур Абакар Мудуновлул чивчумунил. Дяъвилия­сса чIявуми шеърирду ванал чивчуну бур Къиримнал ва Бряннал фронтирттай. Ванал «Катюша» тIисса назмулуву чIалай дур чарив вацIлуха нанисса «Катюшардал» цIарал ятIулсса жартру. Га цIаралу душмантал бур, бан-бит бухлавгун, «къавтIий»:

Чарив тиха, вацIлуха,
Ссурулух дур ххярххун най,
ЯтIулсса цIарал жартру,
Баргълагавал чулийннай.

Оьккисса дакъар макьан,
Хьувча «ссувхIат» гур дусса,
Ци банссар – чичру диркIссар
Душмантал къавтIи бансса.

Цала назмурдаву Абакар Мудуновлул хIарачат буллай ивкIссар дяъвилул суратру чIа­ланну щащан. Вана кьунну душмантуран цивппа ца буссаривгу ккаккан бувну, землянкалуву ккик тIисса саллатIначIан бахшишру ларсун бувкIун – фронтрал къинттуллуха бювхъу-бювхъунал гьан дурсса посылкартту, чагъарду. Жула шаэрнал шеърилувусса виричунал, дуснахь була куну, ласай шанмурцIу чагъар.

Ласав, ппив бав, буккав,
Ххарил макь рутIав,
Ттуршра дуаь дував
Чивчуманаха.

Чагъар ча бунугу,
Щийн тIий бунугу,
ЦIа щил духьурчагу,
Махъру ниттил бур.

Ци-ци дакъар ва шеърилуву: шаппатусса, бюхъай, ниттияту­сса чагъарданух мякьсса талаталагу, ганал хъуннасса Ватангу, ниттил зумувну гъилисса махъ цума-унугу саллатIнахь учин бюхъайсса щарссагу.
Абакар Мудуновлул ялагу, 60-80-ку шиннардий, чивчуссар дяъвилун хас бувсса чIявусса поэмардугу, хавардугу.

Мирза МахIанмадов дяъви байбишиннин хьхьичI увцуну ивкIссар ЯтIул Аьралуннавун, тиччава цала дустуращал архIал гьуртту хьуссар Хъунма­сса Буттал кIанттул цIанийсса дяъвилий. Фронтрай кIусса щаву дирну, 1942 шинал га зана хьуссар Хъусрахьхьун. Душманнащал талай, оь экьибувтIусса шаэрнал творчествалуву агьам­сса кIану бугьлай бур дяъвилул темалул.

Вапа бакъа ккуллалул
Ппив дарчагу кия ка,
Оьттул оь кьисас ласун
Сагъссар ттул урчIамур ка.

Нану, аьзизсса ттупанг,
ЦIакь хьу тти ттул кIунттиву,
Иш багьарчан, душманнан
Ккаккан дуван чувшиву.

«ДакIний битаву», «Оьрму», «Ник къарищунна» ва мукуна цаймигу назмурдаву шаэр хъунмасса пахрулий ур цала совет халкьунная, миннал дяъвилий ларсъсса бюхттулсса ххувшаврия.

ЦIу кIири дяъвилуву
Чувшиврий заву ласлай,
Хьуссар ттул шаннахъул шин,
Душмантал къидир буллай.

Автоматрал вярттувух
Ккуллардал чявхъа бутIлай,
Ларсъссар на душманнал жан,
Оьвкъакуна увкIун тIий.

Гитлердул цIакьшивурттайх
Ххувшаврил ххархху ласлай,
Бивщуссар жу ЯтIул Ттугъ
Берлиннал та Рейхстаграй.

Аьбдул Мирзаев дяъвилул шиннардий къуллугъ буллай ивкIссар МВД-лул аьралуннаву. Мунияту ганал творчествалуву хъунмасса кIану бугьлай бур дяъвилун хас дурсса назмурдал. ЧIявуми ванал балайрду бур дяъви къуртал хьуну махъ чивчусса, амма цавай бур дяъвилул чIумалссагу.
«Ххувшаврил хьхьу» тIисса назмулул лирикIийсса виричунан, хьхьувай гьарахъа шавай най уна, цала къатрал чIавахьулттий ххал шай чирахърал чани. ДакI нигьа дуслай дур, чIалсса хьхьуниву чирахъ ххал хьувкун. Азарва журасса пикри багьлай бур дакIнивун, аман, оьсса хавар бурвав аьрая бувкIун, уссил бишай кьяпа канил бувгьуну, зума тIий дурвав бава?.. Юх, ми цавагу хьуну ляхълай бакъар. Нину хъямала дагьлай дур гьарахъа увкIсса арснайн.

Арс, дяъви къурталссар,
мурад буллуссар.
Уссу учIантIиссар,
арс учIантIиссар!

Га дур Хъуннасса Ххувшаврил хьхьу.
Так шаэр ур дуаь дуллай:

Цуксса ххаринугу,
цуксса ххуйнугу,
Уттиния тиннай
мадучIарача!

«Ниттил гьаттай» тIисса якьамасса назмулуву Аьбдул Мирзаев буслай ур цува дяъвилия учIаннин нину лув къаличIаврия, гьаттачIа цала ккурхIусса къювурдая. Дахьва ниттин ччатI булай чIумал ­аьрайн лавгсса виричу зана хъанай ур шавай ххаришиврущал, ххувшаврищал. Амма шавай увкIсса арснан шарда нину ляхълай дакъар. КьурчIишивруву арс тIий ур:

Ттул нину, на вичIан най
Дуниял диртссияхха,
ДунияллуцIух ларчIсса
ЦIугу лещан дурссия.

Азарийла агьнугу,
Азарийла ивзссияв,
Вихсса ччаврил асардал
Ватан ххассал дурссия.

Бурги цукунсса хъуннасса ва куртIсса ччаврия бурив шикку­сса ихтилат! Шикку хIакьсса поэзиялул ссихI хIала бувххун бур арснал кIирисса ссихIиравух, ихтилатравух.

Минкаил Аьлиев увцуссар армиялийн 1941 шинал. Щаву дирну махъ шавай зана хьуссар. Тай шиннардий Лакрал театрданул бихьлай бивкIссар Минкаил Аьлиевлул чивчусса «ПартIу ПатIима» тIисса драма. Халкьуннал тарихравун багьсса лаккудуш-виричу хъанахъиссар циняв хIайран буллалисса гужрал заллу. Дяъвилул чIумал лакран эбратну чIалай диркIссар ПартIу ПатIимал сипат, ганил чувшиву, кьянкьашиву, цила ватандалул цIаний жан дулун хIадуршиву.
Минкаил Аьлиевлул дяъвилул темалун хас бувну чивчуссар ва сценалий бивхьуссар «ТалихIрайнсса ххуллу», «Рамазанхъал кулпат» тIисса пьесардугу.

ХIасил, лакрал чичултгу, дяъвилувух хIала бувххун, кув ттупангру канил бувгьуну, кувгу кьалан канил бувгьуну, чIявумирив ттупанг ва кьалан канихьну, талай бивкIссар бу­ттал кIанттухлу. Аьрай бивкIсса лакрал чичултрал нанисса никиран кьабивтссар ххаллилсса балайрду ва поэмарду, хаварду ва очеркру, повестьру ва романну. Дяъви къуртал хьуну махъгу дяъвилул ва дакьаврил тема агьамну диркIссар жула литературалуву.

Ххазина Аминова