[dropcap]А[/dropcap]ьдатрайн бувну, армиялийнсса инттусса оьвчаву дайдишайссар апрель зурул 1-нний ва къуртал шайссар июль зурул 15-нний. Амма гьашину апрель барз Аьрасатнаву лавгунни карантиндалий, коронавирусрал инфекция сававну.

ДакI ххарину зана хьуннав!

Зулайхат Тахакьаева
Хъуннасса нигьачIаву дия ми мероприятияртту давриягу. Цалчин, ца кIанттайн батIлай бур чIявусса жагьилтал. КIилчин, военкоматрайн биянгу аьркинни. Миккугу хъуннасса нигьачIаву дур. Ххуллий транспортраву личIи-личIисса инсантал хьунабакьлай бур.

[dropcap]Б[/dropcap]юхъайва инттусса оьвчаву гьашинусса дура-дукьан давриву тIайлашиву дикIангу. Амма, Обороналул министерствалий му иширал хIакъираву бувчIин бувсса куццуй, агарда гьашину интту оьрчIру аьралуннаву къуллугъ буллан къабуцирча, билаятрал аьрал щаллу бакъа личIантIий бусса бур. Мукунсса иш къахьуншиврул багьлай бусса бур, аьралуннаву къуллугъгу бувну, зана хьун аьркинминнал чIун дачIи шинайсса лахъи дуккан дан.

Обороналул министерствалул хIукму бувну бия инттусса оьвчаву махъун рутан, ва му дайдишин май зурул 12-нний, карантин букьан бувсса кьинира.
Гьашинусса акция Лакрал ва Ккуллал районнай цукун най ду­ссарив бувсунни кIирагу райондалул аьрали комиссар ХIасан Масуевлул. Гьашину къуллугъ буллан уцин ккаккан увну усса ур 60 жагьил.
— Коронавирусрал инфекция ппив хъанахъаву сававну чIярусса захIматшивуртту хьунадаркьунни жул давривугу. Тамансса жула жагьилтал бур кьатIув-шав цала маэшатрай. Районнал, шагьрурдал дянихсса транспорт дацIан даврийн бувну, миннаща цила чIумал бучIан хъанай бакъая комиссиялийн. Му бакъасса, муданма кунма, гьашинугу чан бакъая аьралуннавун къагьаншиврул лабикIлакIимигу. Вайннал деларду дуллуну дуссар Лаващавсса Силистталул комитетрайн, — буслай ур ХIасан Масуев. — Комиссиялул цинярдагу давур­тту дурссар коронавирусрал инфекция ппив хьун къаритансса чаранну ишла бувну. Комиссиялийн ца-цаних кьамул буллай, гьарцаннал чурххал температура ххал дуллай. Щак бусса кIия-шама оьрчI мурахас увну, поликлиникалий хъин хъанай уссар.
ЗахIматшивурттах, дайшишрурдах къабурувгун щаллу дуллай буру интнил призыв. Цалчинсса группа тIайла бувкссар май зурул 27-нний. ТIайлассар, цуксса хIайпнугу, гьашину жуща къабювхъунни ми, аьдатрайн бувну, миллатрал виричу Хан-Муртазялил гьайкалданучIату шадлугърай тIайла буккан. Жу миннайн баян бувссар шадлугъру ичIурагу къадуван, республикалул призыврал пунктрачIангу гъан-маччами къабатIин. КIилчинсса группа тIайла буккарду июнь зурул 1-нний. Уттинин кIирагу райондалия тIайла увкссар 19 жагьил. Шамилчинсса группа тIайла буклаки­ссар ва зурул 14-нний, 10 жагьил наниссар му кьинигу.
Призыв лахъи лагантIиссар, хьхьичIрасса шиннардий кунна, июль зурул 15-ннин.
Аьралуннаву къуллугъ бан жула оьрчIру буцлациссар мукьрагу аьра­ли округрайн. Уттинин бувцуми багьунни Ухссавнил флотрайн, Кьиблалул аьрали округрайн ва Архмур Баргъбуккавал округрайн…
ХIасан Масуевлул ххи бунни билаятрал аьрали училищардаву дуклан гьан дакIний бушиву шама жагьилнан ва ца душнин.
Аьрасатнаву бусса бур 40 лавайсса ва 27 дянивсса Аьрали ду­ккаврил идара.
Хъуннасса шадлугърай тIайла буккайссия жагьилтал аьралуннаву къуллугъ буллан. Амма, коронавирусрал инфекция сававну, ва шадлугъраягу махIрум хьунни жула жагьилтал. ДакIру ххарину кIура баяннав зу, оьрчIрув! Шадлугърай тIайла буккан къахьурчагу, шадлугърай хьунабакьлай кка­кканнав зу!