Зул хIарачатру – жул гьунттийсса кьинилийнсса умудрур
«Пайда бакъая хьхьара дуллан. Тагьар мукун оьнийн дагьну дияхха, жул, студентътурал, кумаграх мюхтажну ливчIун бия жул преподавательтал-хIакинтал», — тIий,
буслай бур ттухь утти «угь» бюкьан мутта биривсса, къашайшалтгу чан хьуну, гьунттий-сара цила хьхьичIрасса кьаралданий зунтIисса, Республикалул цIуллу-сагъшиву цIакь дайсса азарханалий (Грязелечебницалий) майрал байбихьулия шинмай зузисса жула лакку душ, ДГМУ-лул 5-мур курсирал студентка Сулаева Мариян Закиринал душ.
Залму АьбдурахIманова
Ванил ппу ур Кьубатусса, нину Бархъалатусса. Бувну бур Мариян Южно-Сухокумскалий. Школагу къуртал бувну, дуклан бувххун бур ДГУ-рал биологиялул факультетрайн. Вагу къуртал бувну, бувххун бур медициналул вузравун. КIилчинмур кIулшивугу ларсун, ва медициналувун бувцуну бур оьрчIниява хIакин хьун ччай бивкIсса хиялданул.
Шиккун бучIаннин ва хIадур хьуну бивкIун бур «Анаварсса кумаграй» зун гьан, гиккусса тагьаргу кIулну. Гикку гьарца бригадалун биялсса хIакинтал бакъа тIий, шиккува зун рязи хьуну бур. Майрал цалчинми гьантрай азарханалул хIаятравугу, ганил кьатIувсса кучалийгу «Анаварсса кумаграл» машинарттаха буккансса, ша бизансса кIану къабивкIун бур. Къашайшала кьамул аннин 4 ссятрай ирглий бацIан багьайсса чIунну диркIун дур.
«На бучIайхтува багьунав хьхьунил сменалийн. ЦIубакIрай 40-50 минутI шайва жул мюхчан бай костюмру лахханнин. Дияхха байбихьулий гай чурххан муксса къатIааьнсса, маскарду, очкив кьутIлатIисса. ЧIумул гьарзат лахIан дайсса диркIун дур.
Къашайшалтрал аь-къаналуха тIааьндакъашивурттугу, ссуссукьушивурттугу хъама риртун, жула даврихух лавгун лявкъунав. Даймургу дурну, цахъи хIаллайсса цичIав дансса дакъасса чIумалгума, ччан бикIайва къашайшалт буний аглан хъанан. Жу итталу буну, гайннавун чанссарагу рахIатшиву, паракьатшиву дагьайнуккива», — тIий бур Мариян.
Шиккува зугу зий, ягу хъанай вайннал хьуну бур барз ва ххишаласса гьантри. ЦIана къашайшалт шамли-мукьли чан хьуну бунугу, Мариян ва ванищалсса душру-оьрчIру цала кумаг шиккусса хIакинтуран ва медсестрахъан бувагу къааьркин хьуннин зун рязину бур.
Ттущалсса ихтилат къуртал буллай, Марияннул ялагу тикрал бай: «Нава азарханалийн бувкIсса цалчинмур хьхьу дакIниярагу къадуккай. Агьалинал бувцIусса жанахIравусса угь-къаклил, аьтIаврил, кумаг чIа тIисса чачунссагу чIурду. Га хьхьу тачIав къагьансса ххива. Га хьхьуну ттун бугу-бувчIуна нава дунияллий ца яла чумартмур, тIайламур ва хъинбала бан шаймур пиша язи бувгьуну бушиву», — тIисса махъру.
ТIайлабацIу баннав вин, Мариян, вищал архIалсса циняв жагьилсса хIакинтурангу. Зул хIарачатру жул гьунттийсса кьинилийнсса умудрур.
