Жулва оьрчIал цIуллу-сагъшиврул къаралданий

ПатIи Шагьмурадова

[dropcap]В[/dropcap]ай кIива зурул дянив жулла республикалул медициналул чIявуми идарартту зий бивкIунни цанна къааьдатсса низамрай, цIанасса тагьардануцIун бавкьуну.
ЦIана чан-чанну тIий аьдатсса кьаралданий зун хIадур хъанахъисса МахIачкъалаллал ОьрчIал 1-мур поликлиникагу вай кIива зурул му­тталий коронавирусрал биялдаралу зий бивкIунни. Ва жулва хъуншагьрулий оьрму лавгсса гьарнан кIулсса, МахIачкъалаллал тарихрал хьхьичI ххуттайсса, Малыгиннул цIанийсса кучалийсса, хьхьичIавасса поликлиникар. Азар дакъа, аьдатрайсса низамрай зузисса чIумал вай­ннан багьайссар хъуншагьрулул 34 азараксса оьрчIал цIуллу-сагъшиврул ялув бацIан. Вайннайн багьайсса бур Кадетътурал школалий ккала­ккисса оьрчIругу.


Залму АьбдурахIманова
[dropcap]Ш[/dropcap]икку зузисса хIакинтурал ва медсестрахъал даврил мурадгу ва базилух бия, коронавирусрал къашайшала усса кулпатравусса оьрчIру хасъсса сияхIрайн лавсун, миннал цIуллу-сагъшиврул ялув гужну бацIан. Ковидрал къашавайсса ягу мунийн щак бусса мюрщи къашайшалт кьамул байсса, сайки азарханардай­сса «ятIул зоналун» ккаллийсса мюхчан бай кабинетраву хIакин-инфекционистнащал зий бур медсестрану Ппалассуннал шярава­сса Илияслул душ Шагьмурадова ПатIигу. Ванил бусаврийну, мартрал ахирданий гьануцIакул даххана хьуну дур вайннал мюрщи къашайшалт кьамул байсса даврил низам.
«ХьхьичI гьантрай жул поликлиникалий бигьану бакъая, цичIав аьркинссагу канилу дакъа, азардания мюхчан баймургу диял къахъанай. Апрельданул дязанния шихунмай жу гьар цимурцаннул щаллу бувнав хъуншагьрулул каялувчитурал.

Барчаллагь учин ччай бура щалва коллективрал чулуха жула мэр Салман Дадаевлухь, жу даврий ишла дайсса цимурцаннул дузалшинна даврихлу. Жул поликлиникалий дуллай бивкIунни оьрчIансса ва оьрмулул хъуниминнансса ковидрайнсса тестру ва оьттул анализру. Поликлиникалийн оьрчIру бувцуну букIлан хъанай бакъахьувкун, жул хIакинтал ва медсестрахъул, азар лахъансса хъуннасса нигьачIишиву дунугу, лаглай бивкIунни къашайшала усса кIанттурдайн, оьрчIру яхъа­нахъисса ужагъирттайн», — тIий бур ПатIи, тай цалчинми гьантри дакIнийн бутлай.
Ванищал архIал шикку чIяру­сса шиннардил мутталий бусраврай зий, мюрщи къашайшалтрал цIуллу-сагъшиврул ялув бавцIуну бур отделениярттал хъунимину зузисса Ваччатусса Сулайманова Асият Имраннул душ ва Ккурклиясса Сулайманова Написат МахIаммадлул душ.

Бусравсса хIакиннал пишарай зий, Бархъалатусса МахIмудова Изумруд МахIаммадлул душ, Ккулатусса Губулова Зинаида Аьлил душ, ШавкIратусса Маммаева Шагьрубан МахIаммад-Аминнул душ, Ккулатусса Исрапилова Элеонора Аьбидлул душ, Шуниннал шяраватусса Хархачаева Нуржагьан ХIусайннул душ ва МахIаммадова Роза ­Аттал душ поликлиникалул коллективращал мюрщи къашайшалтрал цIуллу-сагъшиврул къаралданий бавцIуну бивкIунни, вирттал кунма, талай коронавирусращал.
Барчаллагь зун хъунмасса, зу жул оьрчIал ялув бивхьусса захI­матрахлу! Зу бувмур ЗанначIа бучIину лякъиннав.