Цалчинмур кIану – дагъусттанлувнахь

[dropcap]М[/dropcap]инск шагьрулий ялапар хъанахъисса дагъусттанлув Салим Ссапарбагов ххув хьунни Фейсбукрал баян бувсса «Deepfake Detection ChaIIenge» (DFDC) конкурсрай.

Ва хъанахъиссар нейросетьрал (Deepfake) сакин дурсса фейкрал видео ялун личин давриву кумаг хьунтIисса алгоритмарду щаллу даврил конкурс.


Конкурс баян бувссар 2019 шинал сентябрь зуруй. Конкурсрал бахшиширттал фондрал луртан дур 1 миллион долларданул. Цалчинсса кIану бувгьуманан ккаккан дурну дур 500 азарда доллар, кIилчинмур кIанттухлу – 300 азарда доллар, шамилчинмур кIанттухлу – 100 азарда доллар, мукьулчинмур кIанттухлу – 60 азарда доллар, ххюлчинмур кIанттухлугу – 40 азарда доллар.
Конкурсрай гьурттушинна дурну дур дунияллул личIи-личIисса билаятирттаясса 2265 командалул.
Уттигъанну Фейсбукрал баян бунни ва конкурсрай ххув хьуминнал цIарду. Цалчинмур кIану бувгьунни Минск шагьрулий ялапар хъанахъисса Салим Ссапарбаговлул. Ва ур «компьютер зрениялул» инженер.

Уку-укунсса алгоритмардая кумаг хъанантIиссар нигьачIаву ду­сса, аьркин дакъасса видеорду ялун личин давриву, хIисав шавриву, мурив хъанахъиссар дезинформациялущалсса талатаврицIунсса хъунмасса кумаг.

Асия КьурбанмахIаммадова