[dropcap]Р[/dropcap]оза лакку бутталгу, ингуш ниттилгу душри. Чачаннал дяъвилул чIумал цинмагу, цилацириннангу ккакъавкгу къаливчIун, ахиргу Роза оьрчIащал, лихъачулт хIисаврай, Парижлив паракьат хьуссия.
Ватандалий къаккарксса аякьагу, кумаггу, рахIатшивугу цан тих кьисмат хьунни, оьрчIал дурккунни, давуртту ляркъунни, маэшат гьаз хьунни, каши-кьудрат ххи хьунни тIий, рязину буссия.
К. ХIусайнаева
Вай махъсса гьантрай Палангнавусса чачаннал ва аьрабнал дянивсса аварарттал аьратталсса хавар бавукун, оьвкуссия РозачIан, зуйнгу щурив му аваралул щатIив, зухьгу цичIав тIисса цучIав урив тIий. Роза яхъанай Парижлив бухьувкун, ми иширттавух ванил оьрчIру гьуртту хьуну бакъар. Амма цинявгу чачаннан, цанная цаннан баллай, хъанахъисса иширттая кIулну бур. Чачан тих хъинну мугъаятну, лагьну, цала цивппа бувгьуну буссар тIий бур Роза. Палангнал законнал ххуттавагу бувксса, наркотикру ишла буллалинащалссар, жу ва билаятрайнгу, ва хIукуматрайнгу барчаллагьрайсса халкьру тIий бур ва.
Хьумунил сававрагу ци дурив ккаккан, на, гьай-гьайкьай, бурувгра интернетравунгу. Ххиссагу, ххишалассагу материаллу дур миву.
Чачан Республикалул бакIчи Рамзан Кьадировлул, цалва миллатрал инсантурахлу увккун, увкусса мукъурттия тIайла хьуну. На къулагъас дував политолог Руслан Кьурбановлул Европанавусса Чачаннал ассоциациялул каялувчи Аьбдулгьани Жайгьановлущалсса интервьюрах. Ванал бусаврийн бувну, къалмакъал дайдирхьуну дур укун. Дижон шагьрулий чачан оьрчIачIан телефондалувух оьвкуну бур дусъсса албан оьрчIал, нанукьай жун кумагран, аварасса иширахьхьун биривну буруча куну. Чачан оьрчI увкIукун, ганайн ххявххун бур наркотикирттал бувччу бувсса аьраб оьрчIру.
Чачаннал жагьилтал сайки щалагу Европанава ххюттуршлий кьуниясса машинарттай бавтIун бур Дижоннайн, Ниццалийн, аьрабнал ккурандалущал хьунабакьин.
Агу-авттун, пистолетгу зумув бивхьуну, гьарцагу зуланахь жу укун буллантIишиву буси увкуну, итаавкьуну ур. ОьрчIал кулпат цал му иш кьюлтI буллай бивкIун бур, цивппа сававну, инсантурал дянив къалмакъал къахьун. Амма иш ялун ливчуну бур. Чачаннал жагьилтал, наркомантурал къавкъинсса тIуллая укунмагу бияйнийн бивсса, гьалак бувккун бур. «Конфликт чачанналгу, аьрабналгу дянивсса дакъар, я чачанная дайдирхьуну дакъар тIий, — чIурчIав дуллай ур Жайгьанов. — Жул инсантуран къаччимур наркотикру бахлахавур, наркотикирттал авлия бувсса инсантурая ццаххандарай яхъанан къаччишивур, жула оьрчIру мукунминная буруччин ччишивур», — тIий. Чачаннал жагьилтал сайки щалагу Европанава ххюттуршлий кьуниясса машинарттай бавтIун бур Дижоннайн, Ниццалийн, аьрабнал ккурандалущал хьунабакьин.
Жайгьанов буслай ур му давугу гьура-гьайталий дурсса даву къадиркIшиву. ХIукуматрая ихтияргу ларсун, полициянащал архIал, ца ссятрайсса ихтиярданий, бувккун бур митинграйн. Муттаэтал, му ппурттуву лабивкIун, лявкIунугу бивкIун, ихтиярданийсса ссят къуртал шавривун, чачан ппив шайхту, бувккун бур, машинартту ччучлай, ттучаннайн ххяхлай, инсантал ццаххандарал бугьан буллай.
— Яла бувкIуна, — тIий ур Жайгьанов, — жучIан тайннал чулухасса инсантал, ай ялтту бучIияра, жу жувагу вай иширттая къарязиссару, жувагу бизар хьуру, жугу зущал буссару тIий. Жу тIалав барду исламрай жущала маслихIат бансса бусравсса инсантал гайннал чулуха. Баян барду жунма укун лащинсса ишру кьамул бакъашиву ва вания тихунмай жува яхъанахъисса хIукуматрал закондалул ххуттаву яхъанан аьркиншиву.
Африканал билаятирттаясса, хьхьичIарасса Франциянал колониярттавасса аьраб Франциянаву арулва миллиондалияр ххишаласса бусса бур. Вай чIявуми социальнайсса районнал къатраву, яни, мискинми яшайсса махIлардай яхъанай бусса бур, мукунминнавух чIявуми чачангу, цивппа паланггу бусса бур. Я тивун буххан къабитайссар тIий ур Жайгьанов.
— Жул чIарав, жущал архIал Дагъусттаннаяссагу, Ухссавнил Ккавкказнавасса вайми миллатирттаяссагу уссурвал буссар, хасиятрал, багьу-бизулул, яхI-къириятрал кувннаха кув лавхьхьусса.
Мунийн бувну, жу баян бувссар, жунма жула чIарав кьадарсса тIуллугу, тIабиаьтгу дусса халкь къаччишиву. Палангнал полициягу, жущал яхъанахъисса цивппа паланггу ва ппурттух, махъ бакъа, жухлу бия. Палангнал полициялул жула инсантурайн вихшала ххишаласса дур. Масалдаран, гьар шинах ших дикIайсса, ххишала дакъа агьамсса ЦIусса шинал байрандалул гьантрай, шагьрулул мэрнал амрулийну, циняв кIанттурдал къарал жуйн тапшур бай. Полиция ших ихтиярдал ссуссукьуссар. Мунийн бувну жулмур кумаггу тIалав буллан бикIай. Барчаллагь тIун бикIай.
Цаппарасса прессалул зузалт чичлай бия, ай аьрабгу, чачангу наркотикирттал рынок кувннаща кув зехлахисса аварар му тIий. Хъинну хъунмасса щялмахъри. Жу хьхьичIва-хьхьичI наркотикирттайн къаршимиру. Амма цаппарасса политиктуран цал ттигу ччай бур цала лащинсса иширттавух укунмагу зума-ккарччулун багьсса чачан ишла буван. Амма му вания тихунмай бан къашайсса ишри. Цанчирча жуйгу утти биялсса гуж буссар. Утти жула инсантал Европанал парламентравугу буссар, дунияллул спортравугу буссар, адвокатуралул яла бюхттулнийгу буссар, элмулувугу, политикалувугу буссар. . Гьай-гьайкьай, бия политиктал ва иширавугу, чачан кьюкьин бувну, аьраб ххари бан ччисса. Цанчирча, аьраб шийх ххиссагу ххишалассагу бур.
Цивппагу танийра палангнал гражданство ларсъсса. БувчIавурттал чIумал миннал чIурду политиктуран хъинну бучIи лякъинтIиссар. Амма ва ппурттух аьлтта чIалай бия халкьуннан тIайлама цумарив, зарал щиярив. Циняв, полициялия тIайла хьуну, жухь барчаллагь тIий бур. ДакIнийн бичлай бур чачаннал шийх дурсса ххуй-ххуйсса тIуллу. Масалдаран, щала дуниял махIатталну дия ххюйлчинмур, ряххуйлчинмур этажирттайн балконнайх лавхъун, цIу дагьсса къатрава къартту-къужри ххассал бувсса чачан жагьилтурай. Норвегиянаву фашист Брейвик лагерданийсса оьрчIру кьатI буллалисса чIумал, шама чачан оьрчIал ганай чарттал гъарал лачIун дурну, чIявусса оьрчIан лихъан лабикIан пурсат хьуну, ххассал хьушиву. Тай оьрчIан( ца Брейвиклул бивтуну увтуну ия, кIия ххассал хьуссия) Норвегиянал миллатрал Вирттаврал цIарду дулссия. Вания тихунмай жун къакьамулссар цавайннал хIасрат-аькьувалий цайми авадан хъанай, бюхттулнийн лахълай.
Укун тIий ур цала миллатрал ккурандалул чулуха ва ихтилат бан Руслан КьурбановлучIан тIайла увксса Аьбдулгьани Жайгьанов. ДахIалай учин бур, укун цала цивппа бугу-бувгьуну, маслихIатрай, чил миллатраву узданну гьантта бутан лавхьхьусса, жапасса тарихрал сасангу, кьянкьа-кьурчIигу бувсса инсантал. Интернетраву чIярусса дур материаллу, ва ишираву Ухссавнил Ккавкказнал жагьилтурал къириятрай хIайрансса. Жайгьановлул увкусса куццуй, жула ватандалул дазул кьатIув ца чачан бакъар. Бур жуламигу, чаннасса кьадарданух луглай, кьисматрал гъурбатрайн бивчусса. Буний Заннал буруччиннав цинявппагу. Баяймур гьар чулуха ххуйсса баяннав.
