[dropcap]И[/dropcap]юнь зурул 10-нний увссар политикийсса ва жяматийсса иш­ккакку, МухIадлул арс Надиршагь Хачилаев. Гьашину ванан оьрмулул 61 шин хьунтIиссия.

Надирдул сипталий ва хIарачатрай дурсса хъуннасса агьамшиву дусса давурттая хIакьину чIявуминнан кIулну бакъар. Бишлай буру мукунсса ца иширая бусласисса Надирдул уссил Жавраиллул хавар.

---

1996-ку шин. ХьхьичIра икьрал дурну диркIсса куццуй, Ичкериянал каялувчитуращал хьунабакьин наними кIюрххила бавтIуна тани Аьрасатнал Бусурмантурал союзрал председательну ивкIсса Надиршагь ХачилаевлучIа, МахIачкъалалив Титова кучалийсса ванал къатраву. Аьрххилийн бувккун най, Надир щяивкIуна цала машиналий, гиву бия генерал Александр Лебедь ва мунал кумагчигу. Аьмну 5-6 машина бия маслихIат ккаккан аьрххилий нанисса.

Герзельлал пострай жух ялугьлай ия Чачаннал муфти АхIмад-ХIажи Кьадиров. Гагу, цала машиналува увккун, НадирдучIа щяивкIуна. Ваниннин хьхьичI Надирдул ва АхIмад-ХIажинал хъунмасса хIарачат бувссар кIивагу къарши бавцIусса чул хьунабакьин­сса ва ца столданух щябивкIун маслихIат кка­ккансса сант рутлай. Гьай-гьай, кIивайннаннагу агьамшиву ду­сса хьунабакьаврийн нани ххуллий Чачаннал муфтинал ва Аьра­сатнал Совбезрал директорнал ихтилат бансса масъалартту чансса ба­къая. Ппив-ххив хьусса ххуллурдайх най, бачIи ххуллу бивтсса чIумал, Лебедьлун ва ванащал архIалминнан бацIан багьуна, вайннащалсса инсантал нани­сса машина махъун багьну бия.

ХьхьичI кьини гъарал ларчIун, ххуллурдайх оьккисса кьяркьигу дия. Машинартту ччех бикIлай, бацIлай бия, жун ми, къуч буллай, буккан буллангума багьлай бия. Ца укун, машинарттава бувккун, бавцIусса чIумал хьу­сса ишгу дакIний бур. Лебедь ия, пIапIрусгу тIий, жущал авцIуну. Му чIумал мюхчаншиврул къуллугърал хъунама гъан хьуну, Лебедьлухь увкунни: «Александр Иванович, ихтияр дула кIанттул разведка дан», — куну.
«Ина шикку талатавугу кьамул данссар», — куну, рязи акъа­сса жаваб дуллунни Лебедьлул.
Тагьар укуннагу чIурусса дия. Ца ппурттуву жул кортежрал хъирив леххан бувну нанисса ца БМП-лува жу нанисса машинар­ттал ялтту битлан бивкIуна. Яла, ххуллул чIарахсса валттуйх ла­хъан къавхьуну, БМП кIура бавуна.

Мунийну ххассал хьунав жу хъирив агьсса танкистнаяту. Муниннингу хьуна ванихава лавхьхьусса иш. Герзельлал пострая ливчуну, Чачаннал аьрщарайн бувхсса чIумал, жу хьунабавкьуру БТР-дал, танкардал ва САУ-лул колонналущал. Гъан хъанан бикIайхту, хьхьичI нанисса БТР-нува жул колонналул ялтту пулеметрава битлан бивкIуна. Жугу, хьхьичI нани­сса къуллугъчитал бумур машиналул хъирив ххуллул зуманив­ппай хьуну, бавцIуру. Хъирив лаяйхту, танкардугу дарцIунни. Ца бронемашиналува, тIанкI куну бувчIун, жучIан гъан хьунни кьяркьарал гъулувгъусса ца-кIия аьраличу. Миннал хьунив бувккунни Александр Иванович ва мунал кумагчи. Му чIумал ккаккан хъина зун аьралитурал куцру. Колонналул хъунама, яругу бивхьусса хIаписар, Лебедь ккаккайхту, тIанкIгу куну, чурхгу саргъунну лавай кIункIу бувну, авцIуна, цайнма цала дяъвигу бувну.

Гьай-гьай, гай бунт нанисса Чачаннаву Александр Иванович хьунаакьинссар тIий бакъахьунссия. Совбезрал сек­ретарь ва аьрххилий нанишиву хъинну чансса инсантуранни кIулну бивкIсса. Му кьюлтI бувну бивкIссар, цанчирча ва аьр­ххилийн хъар хъанай диркIссар операциялул хIасиллу. Дакьаву къаччисса ва хьунабакьаву къахьунмур банссагу чан­сса къабивкIссар. Тагьарданиягу бувсун, ялагу цайнма цивппа къабучIавай, хIаписартал ва миннал колонна ларгуна, жугу Атаги шяраваллил чулийнмай жула ххуллийн багьру. Тани­сса Лебедьлул мюхчаншиврул къаралданул хъунама лавай­сса къуллугърай ур цIана, цIа кIицI дуллан ччай акъара. Архну гьаншиву чIалай ия танива. На ми аэропортрая бувцуну увкIсса чIумал НадирдучIан, ва, циняв къатравун ухлай, уруг­лан ивкIуна. Му тIааьн къабивзсса Лебедьлул ккиш куна: «Жува жула дустурачIа хъамалуру бусса, жунна шикку цичIав нигьачIаву дакъассар», — куну.
На ялув бувсъсса, та жул колонналия махъун багьну бивкIсса «Мерседес» машиналия тIурчарив, танил махъмур сидениялий ия кIия ттуна аьжаив ивзсса пассажир.Та чIумал та машина жул хъирив къабувкIунма ливчIссар. Циван, ци мурадрай най бивкIссарив тай инсантал къакIулли. Щупирнал махъ щяивкIма ия олигарх. АрхIал наниссаксса хIаллай му зума къаавхъуна. Ххуллийх ци ишру хъанарчагу, паракьатну щяивкIун ия. ЧIаравма къуллугъ биривсса чиновник ия, паракьат акъасса, шаттирахун ссавурданува уклакисса.
Танисса, тарихраву личIан­тIисса та хьунабакьаврил, цийнгу хъуннасса вихшала дирхьуну бивкIсса чачаннал агьали, дурну диркIссар ахир Чачаннал аьрщарайсса дяъвилул. Дяъвилул башттан бувсса агьали кIура бав­ссар паракьатсса оьр­мулийн. Надиршагь Хачилаевлул ва АхIмад-ХIажи Кьадировлул хIарачат дузрайн бувккун, цаппарасса нюжмардава чирчуссар Хасавюртуллал дакьаврил икьрал.

Жавраил Хачилаев
ХIадур бувссар
Андриана Аьбдуллаевал