[dropcap]К[/dropcap]оронавирусрал азар ппив хьун къаритансса чаран лякъаву мурадрай сакин бувсса региондалул оператив штабрал Республикалул БакIчи В. Васильевлул каялувшиндаралусса заседаниялий маслихIат ккавккун,
республикалул бюджетрава итадаркьунни 263 миллион арцул коронавирусрал ва пневмониялул къашавайсса инсантуран кумаг буллай бивкIсса медициналул зузалтран дулунсса.
Вай арцу ккаккан дурну дур коронавирусрал инфекция сукку хьусса чIумал кумаг буллай бивкIсса «Анаварсса кумаграл» медперсоналданун ва шупIиртуран, хIакинтуран-эпидемиологтуран ва миннан кумаг буллай бивкIминнан, федерал бюджетрава итадаркьусса арцу къадагьлагьисса, пневмониялул къашавайминнан цалчинсса медициналул ва санитариялул кумаг буллай бивкIсса медициналул зузалтран.
Вай арцу дагьлай дур мукунна коронавирусрал инфекция дусса къашайшалтрал диагностика дуллай бивкIсса Республикалул ва МахIачкъала шагьрулул диагностикалул центрдал медициналул зузалтран.
Региондалул оператив штабрал бусласимунийн бувну, июнь зурул 9-ннийн бияннинсса чIумуву Дагъусттаннай сияхIрайн лавсун ур коронавирусрал къашавайсса 6077 инсан. Махъсса гьантрай 107 инсан ялун ливчуну ур. Пандемия дайдирхьуния шинай региондалий хъин хьуну ур 4611 инсан, ивкIуну ур 309 инсан.
А. Аьбдуллаева
